Refineria di Aruba ta cuminsa cu un programa di certificacionDiasabra ultimo, durante Expo Labor 2017, Minister di Labor, Angel Bermudez a haci entrega oficial di e decreto cu ta activa comision encarga cu programa di certificacion pa Refineria di Aruba.
Despues di un estudio di 3 luna, e comision aki cu ta consisti di Alvin Koolman, Philip de Souza, Yvonne Lee-Perez, Francis Trimon, Stephanie Croes, Sheila Maduro y Gina Maduro a entrega un rapport na December di aña pasa cu e proposicion pa introduci un programa di certificacion pa prepara nos hendenan pa bolbe tereno industrial.
Segun director di Refineria di Aruba (RdA), Alvin Koolman, awo e comision ta continua cu e siguiente fase unda cu ta determina den tres luna di tempo cuanto e programa aki ta costa y con precisamente e ta keda ehecuta.
Sr. Koolman a sigui splica cu den mundo petrolero e ta hopi mas barata awendia pa trece un contratista pa e haci e trabounan necesario y despues bay bek. Cu casi 25 aña di experiencia den e industria aki Koolman a constata cu casi semper e personanan aki ta keda biba Aruba durante henter e operacion di e refineria.
“Casi nunca tin un entrenamento pa nos hendenan, solamente pa e empleadonan directo di e refineria”, asina e director di Refineria di Aruba a bisa. E entrenamento lo consisti di dos categoria, esta esun di “soft skills” cu ta encera trabounan manera ‘manhole watch’ y ‘fire watch’, cu normalmente ta entrenamento-nan rapido.
E di dos categoria ta esun di “high skills” cu ta encera trabounan manera welder y ‘instrument technician’ cu ta trabounan cu ta dura varios aña pa completa. E curso lo dedica primeramente na e asina yama ‘soft skills’ pa asina un grupo grandi di trahadonan por haya un oportunidad pa labora den e refineria.
Adicionalmente, tur contratista cu wordo busca pa traha na Refineria di Aruba lo mester haci e curso di certificacion pa mira si en berdad nan ta completamente capacita pa haci e trabounan necesario y na e criterionan indica pa nos refineria.
“Tempo di Lago nan tabata tin un vocational school y despues cu Coastal, Valero, El Paso, no tabata tin empuhe pa haci trainingnan aki”, asina sr. Koolman a indica. Sin embargo, pronto Refineria di Aruba lo conta cu su propio programa di certificacion.