E siman aki nos pueblo a keda confronta cu e realidad cu ReD tabata vocifera for di hopi tempo caba, un mandatario a keda deteni como sospechoso den un caso grandi corupcion. A mustra pa hopi tempo caba e falta di integridad den aparato gubernamental. Minister Paul Croes a perhudica hopi Arubiano door di privilegia stranheronan riba mercado laboral. E acusacionnan di Procurador General ta asina serio cu Parlamento mester convoca un reunion di urgencia pa duna retiro na dicho mandatario. E no ta un caso aisla, segun candidato number 2, sr. Rudy Lampe.
P’esey partido ReD ta bay cuminsa diadomingo awor cu un tour guide di corupcion. E iniciativa aki a cuminsa na Mexico City y awor ta aplica esaki pa Aruba. Den un bus lo tour e participantenan na tur e diferente sitionan conoci pa corupcion y duna informacion tocante con e modus operandi ta hinca den otro di parti di nos mandatarionan. E meta ta pa concientisa nos pueblo cu corupcion ta stroba e desaroyo di un pais y cu ta wordo calcula cu 10% di nos GDP ta bay perdi den carteranan particular, incluyendo den cartera di un mandatario sin cartera.
E siman aki lo tuma luga tambe e ultimo debate. ReD lo participa na e debate Latino, y e partido lo participa na e anochinan politico cu e grupo di Millenials ta organisa. A tuma nota cu e compania Deloitte a organisa un seminario cu participacion di AVP, MEP y POR tocante e reforma di nos sistema di impuesto. ReD tabata e prome partido cu a papia di un reforma fiscal integral, inclusive fraccion di ReD e tempo ey a entrega un iniciativa di ley al respecto. Y toch Deloitte a dicidi pa laga ReD afo. ReD ta condena esaki, pero na mesun momento e ta mustra cu e ora di berdad a yega. Deloitte ta representa e establishment di Aruba y e elite kier mira sea AVP, MEP of POR den Gobierno. Kiermen e tres partidonan aki t’ey pa defende interes di e establishment y di e capitalistanan grandi. Abo di e clase trahado, di e pueblo humilde bo sa awor pa ken no vota, ya cu e tres partidonan aki sigur lo no traha na bo interes. AVP, MEP y POR lo traha na interes di e elite y contra e interes di e clase trahado y e pueblo humilde.
P’esey di un banda ta condena e hecho discriminatorio aki di Deloitte, di otro banda ta agradecido cu Deloitte a duna stemadvies pa sea AVP, MEP of POR, es decir pueblo sa awor pa ken e tres partidonan aki ta traha, nan ta traha na interes di e establishment. Abo kende ta un trahado, ReD ta sigura bo cu nan lo traha na interes di e trahado, kende a sali perhudica door di e desaroyo economico di Aruba. E capacidad di compra di e trahador a bay drasticamente atras, companianan fantasma ta abusa di e trahado tanto Arubiano como stranhero, y e no por paga un abogado pa busca su derechonan. Anto un grupito, e friends and family di e tres partidonan aki, a bira mas rico, y e resto a bira mas pober. Si abo pueblo humilde kier un cambio pa abo tambe bay dilanti, bo tin cu vota pa ReD dia 22 di September proximo.