ROMA, Italia- Entre e personanan acusa di ta pertenece na e grupo, cu tabata entrega e menornan na otro parehanan a cambio di placa, ta figura un alcalde, politico, dokter, trahadonan social y psicologonan.
Autoridadnan Italiano a desmantela un red cu tabata manipula muchanan den e provincia di Reggio Emilia pa alehanan di nan famia y pa despues entreganan na parehahan cu bon posicion economico pa un prijs hopi halto. E menornan tabata wordo someti na sesionnan di psicoterpaia pa “laba nan celebro’ y ta haci nan kere cu nan tabata victimanan di mal trato di parti di nan mayornan, La Repubblica ta informa.
Entre e personanan acusa ta haya e alcalde di e municipio di Bibbiano, Andera Carletti, hunto cu otro politiconan, dokter, trahadonan social, psicologo y psicoterapeutanan di un organisacion NGO. Te cu awo, un total di 18 persona a wordo deteni y 27 ta bou di investigaicon.
E investigaicon lansa, bou di e nomber ‘Angel y Demonio”, a revela cu e terapianan tabata inclui e uzo di impulso electronico y e manipulacion di recuerdo pa ‘altera e estado di un memoria cercano’ di e menornan como preparacion pa entrevistanan hudicial. A keda determina tambe di e existencia di informenan falso pa separa e muchanan for di nan famia y ponenan den shelternan paga pa amigo of conoci di e acusadonan.
Bou di e pretexto di un supueto modelo institucional pa e proteccion di e menornan maltrata, a lanta un red di un negoshi ilegal. E personanan involucra den e red ta enfrenta cargonan pa fraude procesal, maltrato na menornan, lesionnan hopi grave, falsificacion di acta publico, violencia priva y intento di extorsion, entre otro.