Te cu dia 18 di April proximo por entrega nominadonan pa Copa Hubenil Gobernador Felipe B. Tromp. Pa bini na remarca pa gana e premio mester cumpli cu e siguiente criterianan.
E hoben individual of un grupo di hoben no mag tin mas cu 20 aña di edad. E logronan di e hoben por ta ariba tereno social, cultural of deportivo durante e ultimo 12 lunanan. E period exacto ta di 1 di april 2016 te cu 31 di maart 2017
Ta pone hopi enfasis ariba logronan local, pero no ta descarta participacion den exterior.
E logronan no mester ta referi solamente na premionan cu a gana, pero e participacion activo durante henter aña na un of mas proyecto ariba tereno social, cultural of deportivo.
Riba tereno social por pensa trabou haci na scol, den bario, instancia caricativo, iglesia, scouting, etc. Cultura ta referi na baile, arte, canto, musica, teatro, arte visual etc. Pa loke ta deporte ta referi na tur deporte sea cu a participa via club of individual.
Tur hende por manda nomber di un of mas nomindado. E descripcion mester ta amplio y acompaña pa potret, recorte di corant etc. Por manda e descripcion via email pa [email protected] of pa [email protected]. Of por entrega e dossier personalmente na oficina di Asociacion Trabou di Hubentud na Caya Appeldam na Dakota.
E copa ta dedica na e prome gobernador di Aruba, señor Felipe B. Tromp den feliz memoria.
Un persona cu semper a apoya tur trabou cu ta na bienestar di formacion di e hubentud Arubano. Door di inverti awo den nos hobennan, nos por tin lidernan responsabel cu por guia nos pais den futuro y cu amor pa nan prohimo.
Por sigui nos ariba e facebook page Copa Hubenil F.B. “Felipe” TROMP pa mas informacion tocante ganadornan den pasado. Y ganadonan por pone nan potret pa comparti cu otronan.