Recordando e natalicio di Gilberto François (Betico) Croes

E nacemento di nos Libertador Gilberto François (Betico) Croes riba 25 di januari 1938 a marca un paso importante den historia politico di nos pais cu lo wordo graba cu letranan di oro. Poco ta e politiconan den mundo cu Todopoderoso ta manda cu un mision pa cumpli cun’e a base di talentonan special. Y esey tabata Betico, un lider carismatico, visionario y sirbido di pueblo, kende a duna su bida pa un causa noble, esta Status Aparte. Sin duda cu Betico Croes a realisa un deseo ferviente, un anhelo grandi cu pa decadanan largo a biba den curason di cada Arubiano, esta cu algun dia nos lo ta un pais autonomo den Reino Hulandes. Hecho ta cu mas cu un politico a purba di trece cambio den e sistema estatal cu e pueblo Arubano tabata biba aden, sinembargo ningun por a logra esaki.

Un lucha dedica na su pueblo
Tabata na aña 1971 cu e lider inmortal Betico Croes a haya e inspiracion pa lanta su propio partido Movimiento Electoral di Pueblo (MEP) cu e meta di trece cambio den e structura estatal y tambe pa trece un reparticion husto den e desaroyo economico. Betico tabata sa cu pa logra e meta aki mester trece primeramente union den e pueblo Arubano sin distincion di rasa, districto, religion, status financiero of color politico. E union aki tabata esencial, ya cu tabata existi un division y un politica di segregacion den e epoca ey. Den e proceso pa uni e pueblo Betico tabata e motor pa duna Aruba su propio himno, bandera, ortografia, simbolonan di libertad y identidad di e pueblo Arubano. Semper Betico Croes a bisa cu e ta hopi orguyoso di ta yiu di e tera aki. Pueblo a kere den su sinceridad y den e manera senciyo cu e tabata anda cu su pueblo, pasobra te awe specialmente esnan cu tabatin hopi di haber cu ne ta admir’e y apreci’e.

Logro di Status Aparte
Henter e bida di Betico Croes a ser dedica na e lucha estatal. E proceso estatal tabata uno hopi dificil y cu hopi decepcion na e momentonan clave. Sinembargo Betico Croes a persevera, a kita tur obstaculo den su caminda y hunto cu e pueblo Arubano a percura pa e ideal di mas grandi wordo realisa, esta nos Status Aparte dia 1 di januari 1986. Nos tur como Arubiano mester reconoce cu e lucha cu nos Libertador a hiba no tabata nada facil. Ta hopi sacrificio, sanger, sodor y lagrima a acompaña Betico den su lucha y tur esaki cu un solo meta: Status Aparte pa nos dushi isla di Aruba. Aruba a bira un pais den Reino Hulandes cu su propio Constitucion, Gobierno, Parlamento, Banco Central, Procurador General etc. Esakinan ta e logronan historico cu a haci Betico e Arkitecto, Constructor y Realisador di nos Status Aparte.

Ta p’esey cada Arubiano y tambe tur esnan cu a bin biba den e pais aki mester mustra gratitud pa e logro grandi di Status Aparte. Desde aña 1989 tur aña, riba dia 25 di januari, Aruba ta celebra Dia di Betico. Gobierno e tempo ey a scoge pa e fecha aki como cu ta e fecha natalicio di e gran estadista, Libertador Gilberto François (Betico) Croes. Di e forma aki Aruba por dun’e su homenahe bon mereci y asina un y tur por keda recorda su lucha pa e gran logro cual ta Aruba su Status Aparte. E lucha cu a marca historia di Pais Aruba.

Laga cada un di nos cu den trancurso di añanan a siña acepta nos simbolonan di union y libertad, nos himno bandera, cuminsa realisa cu pais Aruba tin su figura nacional cu mester wordo aprecia pa un y tur y e gran inspirador pa e logro di union aki ta nos Libertador Betico Croes.

FINAL
20190110

Comments

comments