E lucha pa Status Aparte a conoce un momento decisivo den luna di Augustus 1977. E presion di gremio sindical y e union di e pueblo Arubano bao liderasgo di Betico Croes a pone cu Hulanda sucumbi pa e derechonan di un pueblo den lucha. E luna di Augustus aki a recorda cu 40 aña pasa esaki a tuma luga y ta un bon momento pa nos reflexiona. Na prome luga manera Betico a bisa: “Si mi cay na caminda, gara e bandera y sigui cu e lucha.” Esey ReD ta haci, nos a gara e bandera di Aruba y nos ta sigui lucha pa e derecho di nos pueblo riba bon gobernacion.
Ta inaceptabel cu un minister deteni cu acusacionnan serio di corupcion den su contra, ta sigui gosa di su salario. Si tabata trata di un ambtenaar, den prome instancia lo a retene un tercera parti di su salario y despues ta retene completo. Un minister no por wordo trata diferente. Ta inaceptabel tambe cu den Conseho di Minister di dia 23 di Juni ultimo ta dicidi di nombra un cantidad di coordinador den vaste dienst apesar cu tin un personeelstop. Pesey Ricardo Croes, lider di ReD, ta bay entrega un manifiesto nacional na Gobernador dia 1 di September pa exigi pa Gobierno di Reno cumpli cu su obligacion a base di articulo 43 di Statuut pa garantisa bon gobernacion na Aruba y evita cu personanan sospecha di corupcion bira minister y para e nombracionnan politico den aparato gubernamental. Gobernador por keda sin firma e decretonan di nombracion of firma nan y mesora presenta nan pa destruccion di e decision aki door di Conseho di Minister di Reino.
ReD lo sigui cu e lucha, pesey diadomingo awo ta bay tin otro Tour di Corupcion, mirando e exito y e impacto cu e prome tour di corupcion diadomingo ultimo a causa den comunidad. Nos lo sali e biaha aki 10or di mainta y lo bishita diferente sitio conoci pa corupcion. E prome luga e biaha aki lo ta ex Bushiri hotel, vincula cu e escandalo rond di Hard Rock Hotel cu ta involucra e ex minister di turismo. Alabes nos ta recorda e mocion di ReD den Parlamento pa basha abao e ruina aki di Bushiri Hotel y haci’e un beach pa pueblo y un area di recreacion pa nos mesun hendenan. Awe otro idea di ReD ta birando realidad. Simplemente ReD tin e miho ideanan. Pesey vota consciente dia 22 di September, vota pa Aruba.
Partido ReD a reuni 30 di Augustus cu organisacionnan cu ta defende derecho di nos pensionadonan y nos a asumi e compromiso asina ReD drenta den Gobierno, e Gobierno nobo lo sinta na mesa cu OPPA pa yega na un areglo di pago di debe cu Pais Aruba tin cu e pensionadonan. Nos pensionadonan por conta cu e compromiso aki cu ReD tin cu Aruba.