Reclassering buscando donacion pa yuda hobennan cu laptop

Desde comienso di luna di mei, Stichting Reclassering en Jeugdbescherming Aruba a lansa un recaudacion di fondo, pa celebra e di 60 aña di existencia di e fundacion. E fondonan lo wordo uza pa inverti bek den nos comunidad, den forma di laptop [Chromebooks] pa 60 hoben cu ta den necesidad por cuminsa nan estudio na scol secundario na un forma stabiel. E meta ta pa logra recauda e suma necesario den 60 dia, cual ta yegando cerca.

Stichting Reclassering en Jeugdbescherming Aruba ta traha cu hoben diariamente y sa cua ta e factornan cu ta bin dilanti hopi y cu por conduci na criminalidad. A base di e informacion y e tendencianan cu Stichting Reclassering en Jeugdbescherming ta acumula di e clientenan y ta mira riba tereno di nan trabou, e ta bira posibel pa identifica unda mester pone mas esfuerso riba prevencion. E meta di e recaudacion di fondo aki ta pa yega na e suma necesario pa por empodera esnan cu ta vulnerabel den nos comunidad, prome cu cualkier acto of comportacion contra di ley tuma luga, pues contribuyendo na prevencion di criminalidad bow di hoben.

E team di Stichting Reclassering en Jeugdbescherming Aruba a dicidi pa no celebra e ocasion di nan aniversario den forma di un festividad grandi y, a opta pa inverti e suma disponibel, den e recaudacion di fondo aki. Un gesto cu ta sumamente di aprecia y ta mustra e amor cu trahadonan social tin pa e bienestar di nos pais.

Stichting Reclassering e Jeugdbescherming Aruba kier bisa danki na tur compania y persona cu a contribui na e causa aki te cu awor. E organisacion ta na altura cu nos comunidad no ta pasando den e temporada financiero di mas facil y p’esey ta laga e suma di donacion na cada persona pa dicidi.

Tambe ta posibel pa duna un laptop of Chrome Book [nobo] na oficina di Stichting Reclassering Aruba na Ponton [Caya Ernesto Petronia 21-c] prome cu dia 7 di juli 2021. Pa donacion monetario por uza e cuenta bancario di Stichting Reclassering en Jeugdbescherming – CMB 61178310 – Descripcion: 60 aniversario.

Pakico e meta aki

For di experencia di trabou, Stichting Reclassering a conclui cu un grupo particularmente vulnerabel, ta e grupo di hobennan cu ta pasa di scol primario [basis] pa scol secundario. Hobennan entre 11-13 aña di edad cu ta sali for di e seno protegi di basisschool, pa un mundo mas independiente y cu mas influencia externo.

Mirando e situacion di pandemia y e adaptacionnan cu a wordo haci relata na ‘distance learning’, mayoria scol secundario ta exigi of recomenda pa cada studiante tin nan mesun laptop. Esaki no ta facil pa tur famia logra y pa e motibo aki Stichting Reclassering en Jeugdbescherming kier brinda 60 hoben cu ta den necesidad, pa drenta e fase aki di nan bida di forma mas stabiel cu ta posibel.

  • Pa yega na e suma necesario, Stichting Reclassering mester e comunidad henter, ciudadanonan y companianan, pa contribui den forma di un donacion prime cu dia 7 di juni 2021.
  • Trahadornan a duna di nan parti caba, e fondo cu nan lo a uza pa celebra hunto, a wordo inverti den e meta aki.
  • Cualkier suma cu bo por aporta, ta bonbini.
  • Pa mas informacion of pregunta, por tuma contacto na 582-1496 of [email protected]

Comments

comments