Reclasering: ‘Habri aña cu dos caso basta pisa ta señal pa pone atencion na Aruba su situacion’

Seraida Pemberton-Leonard, directora di Stichting Reclassering Jeugdbescherming Aruba, ta comparti cu Masnoticia cu e situacion cu Aruba a habri aña cu dos caso basta pisa ta señala cu nos mester pone hopi mas atencion riba e situacion cu Aruba ta aden aworaki. Nos ta papiando di un periodo 2020 cu a lanta hopi cosnan pa motibo di e pandemia, dus hopi cosnan nobo den sentido negativo; tension na cas y situacionnan financiero cu bo lo wak ta resultadonan di cosnan cu eigenlijk mester confronta na un manera mas directo.

Pa locual ta e dos hobennan cu a cay cera, tin henter un proceso cu mester wordo cana, Reclasering ta bay bishita nan na warda di polis pa haci un sondeo di nan circumstancianan personal pa asina conoce mas e background di nan, y duna fiscal un imagen di ken e hobennan aki ta, kico ta nan circumstancianan personal y kico por a conduci cu nan a comete e delito aki. Esaki ta yuda Fiscal tuma un decision balansa den e caso, dus no unicamente kico a wordo haci pero tambe teniendo cuenta e circumstancia personal di e hobennan.

Den e dos caso di asesinato aki, ta trata di dos hoben, ambos ta menor di edad y mucha homber, ambos ta actonan violento, pero nan ta dos caso totalmente diferente den cual uno por ehempel a sosode den seno familiar y e otro den otro circumstancia. P’esey cada caso y hoben lo wordo evalua riba su mes. Den comunidad sa tin comentario por ehempel riba dicon ta warda te ora algo pasa pa Reclasering cay aden of pa e ayudo necesario wordo brinda na e hobennan aki. Reclasering ta cay aden na momento cu un hoben of adulto haya su mes den problema cu husticia, “nos tareanan ta ancra den ley penal.

E parti pa asina kico mester wordo haci, nos tin diferente instancia manera Directie Sociale Zaken, Fundacion pa Nos Muchanan, Telefon pa Hubentud y tur otro instancianan aki ta traha riba e area preventivo,” sra. Leonard ta splica. Pa asina cu na momento cu mayornan of familiarnan señala cu tin un problema, esaki ta e instancianan encarga na unda por ricibi e ayudo preventivo. Pa ley, Reclasering ta cay aden ora cu e caso bay den husticia, e ora ey nan ta haci investigacion na unda despues e hoben of adulto ta bay bao guia di Reclasering, e ora ta sondea wak kico tabata e ‘Red Flags’ y purba traha cu esakinan.

Comments

comments