Parlamentario Endy Croes a atende e recepcion di despedida di Procurador General mr. Alexander van Dam diahuebs ultimo na Tierra Del Sol. Manera ta conoci mr. Alexander van Dam a tuma e reto como Procurador General di Aruba pa 3 aña. Conseho di Minister di Reino a propone su candidatura unda su nombramento a tuma luga desde 1 di Juni 2016 pa 3 aña. Promer cu e reto nobo aki Alexander van Dam a fungi como Hoofdofficier suplente na Zeeland –West-Brabant.
Desde yegada di Alexander van Dam el a splica cu su “drive y challenge” ta pa aporta na siguridad di tur Arubiano y henter comunidad di Aruba. Tarea primordial di Ministerio Publico ta pa combati criminalidad y percura pa ehecucion penal di orden hudicial hunto cu tur otro partner den cadena di husticia manera entre otro Cuerpo Policial, Douane, Belastingdienst, Landsrecherche, Servicio di Seguridad di Aruba, Kustwacht, VDA, RST, Guarda Costa, KMar, Commandant Zeemacht Carib y PG nan den Caribe pa nombra algun, hunto cu su propio team di riba 50 empleado. Ministerio Publico ta sirbi estado di derecho y estado di derecho kiermen ABO!
Tarea sinembargo di un Procurador General ta hopi amplio unda entre otro e mester presenta casonan cu ta bay den corte di apelacion pero alabes semanalmente e ta den contacto cu Minister di Husticia, Hefe di Polis, tur otro cadenanan den husticia y ta responsabel pa e maneho di Landsrecherche.
Aruba sigur ta contento cu e trabaonan valioso desplega pa mr. Alexander van Dam y alabes tin cierto sentimento di tristesa cu 3 aña a pasa asina lihe y cu Alexander mester regresa. Alexander van Dam den su discurso di despedida a splica cu e lo t’ey bek pronto pa traha di cerca cu e Procurador General nobo cu lo wordo nombra pa asina duna su aporte pa “werk in” e PG nobo na e miho manera posibel dunando asina su contribucion. Van Dam a gradici tur presente y sigur tur su coleganan y henter e cadena di husticia cu a dun’e sosten pa cu su trabao.
Minister di Husticia mr. Andin Bikker tambe a hiba palabra y a gradici Alexander Van Dam den nomber di henter comunidad y alabes a sorprend’e cu un regalo masha bunita como recuerdo. Tanto Minister Presidente Evelyn Wever Croes, Minister di Husticia Andin Bikker, Minister di Finansas Xiomara Ruiz Maduro, Parlamentarionan Shailiny Tromp Lee, Sue Ann Ras, Hendrik Tevreden, Edgard Vrolijk y Endy Croes tabata entre esnan cu a acudi na e recepcion di despedida di Procurador General mr. Alexander van Dam.
Un gran cantidad di amigonan di Alexander van Dam y coleganan den cadena di husticia tambe tabata presente pa asina por desea Alexander van Dam tur cos bon bek na Hulanda y sigur den su retonan nobo. Parlamentario Endy Croes den nomber di henter e Team ta termina deseando Van Dam tur cos bon gradiciendo e pa tur su trabaonan cu el a desplega na interes general di Pais Aruba den e ultimo 3 añanan.