“Recap di siman” di Ministerio di Desaroyo Teritorial, Infrastructura y Medio Ambiente 8 April te cu 14 di April 2019

Dialuna den e conferencia di Prensa semanal di Gabinete Wever – Croes, Minister Otmar Oduber a trece informacion na comunidad riba tres tema. (1) Proceso di destaho publico pa remediacion di Parkietenbos, (2) proyecto di ‘slip’, desperdicio medicinal y carcas via e tecnologia di incineracion y (3) Conscientisacion pa e temporada di campamento.

Trabounan grandi tumando luga riba caminda principal di Santa Cruz! E caminda aki ya pa hopi aña ta den mal estado y tabata mester un mantencion, awor comunidad por mira cu fondo pa drecha nos camindanan realmente ta wordo utilisa pa cumpli cu e necesidad cu tin den comunidad. E trabounan lo ta tumando luga anochi, teniendo consideracion y reduciendo e posibel molester cu e trabounan lo por causa pa esnan cu mas ta haci uzo di e caminda.

E siman aki Gobierno a duna un presentacion di e asina yama “Aruba Property Funds” na comision permanente di infrastructura den Parlamento. Ta trata aki di un entidad nobo, di gobierno, cu lo keda encarga cu e maneho di edificionan y scolnan bandona di Gobierno.

Recientemente a anuncia e inicio di e restauracion di e edificio di Uncle Louis Store. Manera cu e edificio wordo restaura, e departamento di Naturalesa y Medio Ambiente (DNM) lo wordo ubica den e edificio. Ubicando departamento di Gobierno den e edificio ta muestra di e compromiso cu tin di parti Gabinete Wever – Croes pa sigui stimula economia pariba di nos isla! Uncle Louis Store ta un edificio cu a wordo construi den aña 1951 den Promenade y cu awe ta un Monumento reconoci y cu tin un balor historico na San Nicolas.

Diahuebs Minister Oduber tabatin e placer di por a reuni cu Minister di Corsou encarga cu Trafico, Transporte y Desaroyo Teritorial sra. Zita Jesus – Leito. Den e encuentro importante y sigur fructifero aki a trata diferente tema manera maneho di tereno y desaroyo teritorial, a intercambia informacion, reto y forma di traha. Locual cu a resalta ta e tremendo interes cu Minister Jesus – Leito tabatin riba e manera cu Aruba ta acerca diferente tema y a indica cu tin e intencion y deseo pa traha hunto cu Aruba pa regionalmente reforsa e maneho pa locual ta e diferente temanan relaciona cu desaroyo teritorial.

Comments

comments