SOUTH CAROLINA, Merca- Un prizonero cu dialuna a presencia entre gang, den cual a muri shete prizonero y 17 mas a resulta herida, a logra comunica cu AP y conta con tur cos a sosode. “E curpanan tabata un ariba otro”.
Den e pelea sangriente cu a tuma luga dialuna den e Lee Correctional Institute, un prizon di maximo siguridad den e estado di South Carolina, Merca, a biba momentonan realmente infernal, segun un di e prizoneronan sobreviviente.
Al menos shete prizonero a muri y 17 resulta herida, despues di cu gangnan interno a cuminsa bringa cu otro diadomingo anochi, den e prizon situa na Bishopville, 88 km oost di e ciudad di Columbia, despues di algun luna di actonan violento.
“E curpanan tabata montona un ariba otro”, e prizonero a conta. Ela presencia e pelea. Pero e ta prefera di mantene anonimato ya cu e tin prohibi pa uza celular y tin miedo di represalianan di su compañeronan.
E prizonero a comunica cu prensa durante e shete oranan cu e enfrentamento a dura y a bisa di a wak un homber herida, cu tabata purba lanta , pero a cuminsa haci zonidonan straño. E prizonero herida aki a muri un rato despues, tira riba vloer mientras cu e personanan cu a herid’e tabata hari’e y insult’e.
Riba videonan publica ariba rednan social por mira manchanan grandi di sanger riba e muraya y pisonan di e prizon.
Mayoria di e heridanan a wordo produci pa cuchiu, e unico armanan cu e gangnan a logra haya den e pelea pa teritorio, placa y articulonan di contrabanda. E pelea a wordo organisa pa medio di telefonnan celular.
E preso sobreviviente te conta cu e guardianan di siguridad “nunca a purba yuda of controla e disturbionan, nan a keda sinta den e sala di control, reporta e hecho y no a haci nada”.
Pero e director di e prizon, Bryan Stirling, a informa na prensa cu “nos a reuni e mayor cantidad di oficialnan cu nos por, mas lihe cu nos por y nos a drenta ora cu nos tabata sigur di cu tabata sigur pa nos personal.”.
Afortunadamente, no tabata tin herido entre e forsanan di siguridad.
E Lee Correctional Institution ta un prizon di maximo siguridad y e fayecidonan tabata cumpli cu’n condena di entre 10 aña y cadena perpetua, pa crimennan cu tabata varia di asesinato pa trafico di droga.
E victima mas hoben tabata tin 25 aña y e mas grandi tabata tin 44 aña.
Fuente: https://www.mirror.co.uk