Incredulo y cu consternacion mi a lesa den un corant local e declaracionnan cu Sr. Luongo, Vice-President di PDVSA, a haci durante e ceremonia di apertura di CITGO. E ceremonia tabata un celebracion di un acuerdo comercial entre CITCO y Refineria di Aruba (RdA). E hecho cu Gobierno Venezolano ta doño di PDVSA y cu PDVSA ta doño di CITCO ta haci cu esaki ta un acuerdo di un Gobierno cu otro? Si e ta mes, esaki no kiermen cu Sr. Luongo mester introduci ideologia socialista di e gobierno Chavista di Nicolas Maduro den e ambiente comercial.
Ta absurdo cu Sr. Luongo na e ocasion aki ta referi na principionan di e revolucion Bolivariano como “Principionan di construi un pais cada dia miho. Construi un socialismo y construi e maximo felicidad pa nos pueblo”. Si esaki ta riba agenda di CITCO y PDVSA pa Aruba, mi ta sugeri nos gobierno bisa nan, “Thanks, but, no thanks”.
Aki na Aruba nos no mester di gobierno revolucionario pa trece felicidad pa nos pueblo. Nos ta traha duro y honestamente pa tur loke ta toca nos. Nos pueblo ta bon na haltura di e “maximo felicidad” di nos rumannan Venezolano cu ainda no a huy di nan pais. Un país caminda Arubianonan tabata bay pa haci compras, pero awor ta e país di “no hay”, resultado di e ineptitud y corupcion di e Gobierno revolucionario.
Puntra farmaceutico na cualkier botica aki na Aruba cuanto remedi nan ta bende tur dia pa pashentnan na Venezuela. Pasa algun ora den PriceSmart pa mira e cantidad di comestibel, habon di baño y di laba paña, pasta dental, cosmetica, material di limpiesa, etc, etc., etc. cu Venezolanonan ta cumpra pa hiba of manda pa nan famia. Ami sa, pasobra mi señora y ami tambe mester cumpra tur e cosnan ey pa nos hendenan na Maracaibo por sobrevivi.
Venezuela awor ta un pais caminda tur dia centenares di mucha y hende grandi ta muri pa falta di cuminda, medicina y materialnan medico. Un internista a prescribi un inyeccion pa mi suegra cu tabata sufri cu dolor. Ni e medicina, ni sikiera e hangua pa e inyeccion tabata disponibel na e pais di “maximo felicidad”. Esaki ta e país cu e prestigioso revista Forbes a duna e distincion di ta e mas corupto di mundo. Un pais cu tin mas homicidio per capita cu tur otro pais di mundo occidental, cu un homicidio cada 20 minuut. Un pais caminda e gobierno a haci bofon di e constitucion di e pais cu sosten di e Tribunal di Husticia mes corupto.
Como cu tin asina tanto hende ta pasando hamber nan mascotanan tambe ta sufri. E cayanan na Caracas y otro ciudadnan grandi ta yen di cacho y pushi cu e doñonan a laga los pa nan busca pa nan mes. Ken por convencemi cu e hendenan cu ta bay coba den bari di sushi di restaurantnan pa haya algo pa tira na stoma e dia ey ta hendenan cu ta experiencia e “maximo felicidad” cu Gobierno revolucionario ta pretende di a trece pa su pueblo y kier trece pa nos pueblo Arubano.
Un sobrina di mi señora ta coriendo stage como dietista na un hospital di Gobierno y aya tur dia e ta mira personalmente con hendenan ta pasando hamber. Aya e hospital no ta duna cuminda na e pashentnan, ta famianan mester trece cuminda. Pero si e famianan mes no por haya tres cuminda pa dia, e pashentnan tin dia ta haya apenas un cuminda. E trabou di dietista na Venezuela ta un oxymoron, un contradiccion. E dietista por pone tur cos riba papel, pero si no tin e cumindanan pa realisa e dieta, forsosamente mester haci “dieta di Nicolas Maduro”, pasa hamber.
Na e prizonnan di Venezuela un situacion ainda pio ta existi. Aya tampoco gobierno ta duna cuminda na nan “huespednan”, nan cuminda mester n di nan famia. E siman aki tabatin un exposé di e situacion inhumano den e centernan di detencion na diferente estado. E prizoneronan tabata haci mi corda e hudiunan na Auschwitsz tempo cu nan a wordo libera na final di Guera Mundia II. Cuero riba weso. “Maximo felicidad” socialista.
Con un pais cu posiblemente tin e inflacion mas halto di mundo, mas di 700%, por kere cu nan pueblo ta feliz. Ta tuma 5 dia di trabou na e salario minimo pa paga pa un caha di 30 webo di galiña. Esey ta ora cu por haya webo!
E acuerdo entre Citco y RdA ta bon pasobra e ta beneficia tur dos banda. Venezuela lo por produci mas petroleo aceptabel riba mercado mundial y Aruba lo por haya algo pa su inversion den e refineria. Pero aki na Aruba nos no mester “construi un socialismo y construi e maximo felicidad pa nos pueblo”. Asina mes, danki, Sr. Luongo, pa bo oferta. Nos ya ta conoci mundialmente como “One Happy Island”!
Tur e fotonan ta cortesia di Guardian Digital di Inglatera
