PHILIPSBURG, St. Maarten – Recientemente RBC Merchant Bank (Caribbean) Ltd. a organisa un evenemento na St. Maarten pa celebra e emision exitoso di un bono di $32 miyon di TelEm. E emision di bono a keda regla pa RBC y e firmamento oficial cu TelEm a tuma luga na October, despues di lunanan di negociacion.
RBC a organisa un encuentro informal pa TelEm Group, e inversionistanan y e team di transaccion pa celebra e acuerdo cu a keda firma y tambe pa reconoce e trabou y sosten cu a contribui na e exito di e transaccion. E emision di bono ta representa un prestacion notabel di tanto RBC como TelEm.
TelEm Group lo uza e fondonan di e emision di bono pa financia futuro inversionnan y pa refinancia debenan existente. E bono ta un complementacion riba un fiansa di €8 miyon di e Europese Investeringsbank (EIB) aña pasa pa e proyecto di ‘Fibre to the Home’ pa henter St. Maarten. Seis inversionista grandi a suministra e capital necesario pa e bono. Esaki ta e di dos biaha cu TelEm Group a acerca mercadonan di capital regional cu exito pa asina sigura financiamento di inversionistanan regional, asina Helma Etnel, e Chief Financial Officer di TelEm Group a duna di conoce. E bono y seguidamente e acuerdo di fiansa a percura cu TelEm por a renegosha exigencia y condicionnan mas faborabel. E compania di telecomunicacion no mester duna cuenta y rason na diferente financiado mas, manera antes tabata e caso, pero solamente na un compania via di un trustee.
Andrew Boissiere, Vice President Corporate and Investment Banking na RBC Merchant Bank ta bisa: “Nos kier logra nos meta door di yuda nos clientenan crece. E proceso di transaccion a keda caracterisa pa retonan, sorpresa y negociacionnan delicado. Sinembargo, un acercamento innovativo y flexibel, colaboracion regional y teamwork a contribui na un resultado exitoso. Nos ta sumamente orguyoso di nos relacion cu e isla di St. Maarten y nos ta spera cu nos por continua esaki cu e bono di TelEm. Nos ta contento cu nos por a duna un contribucion na mehoracion di e infrastructura di telecomunicacion di e isla.”
Pa enfatisa e resultado exitoso Boissiere a otorga TelEm Group cu algun award. “Nos ta gradiciido na RBC pa e pasenshi y e trabou duro pa sigura e acuerdo di bono aki y nos ta ancioso pa wak locual futuro ta trece”, asina Etnel a bisa.