Recientemente RBC Royal Bank a haci un donacion na Mary Joan Foundation pa duna sosten den nan lucha contra cancer di pecho. Pierre Rafini, Country Manager di RBC Royal Bank (Aruba) N.V. conhuntamente cu Mirjam-Auwerda Jansen, Area Vice-President di Personal Banking a entrega un cheque na Sra. Arabella Reyes-Colina, Presidente di Mary Joan Foundation (MJF).
“E trabou cu MJF ta haci pa nos comunidad y pa esnan cu ta diagnostica cu cancer di pecho ta di sumo importancia. E malesa aki ta afecta hopi di nos personalmente y por medio di e contribucion aki nos kier duna bida na RBC su meta: yuda nos clientenan crece y nos comunidadnan prospera. En general e trabou di MJF ta wordo posibilita por medio di donacionnan y cu e gesto aki nos kier demonstra nos precupacion personal na esnan cu ta biba cu cancer”, segun Rafini.
En conexion cu e cancer awareness week RBC a invita e fundacion pa tin un booth na RBC Sasaki Branch pa asina duna informacion y conscientisa cliente. Trahadonan di RBC tambe a haya un presentacion tocante e malesa aki cu wordo presenta pa Sra. Consuela Cameron, Trahado Social.
Mary Joan Foundation a lanta desde aña 2007. Nan meta ta sirbi comunidad tambe dor di conscientisa y suministra informacion tocante cancer di pecho y bienestar fisico y spiritual. Mary Joan Foundation kier logra su obhetivonan mediante lectura, seminario, reunion, articulonan den corant, programanan na radio y television, acercamento personal y diferente otro actividad.