Anualmente, RBC Royal Bank ta contribui na e “Kinderboekenweek” organisa door di Biblioteca Nacional di Aruba. A cambio di esaki RBC ta ricibi diferente bukinan di mucha, di cual e banco ta haci un donacion na un skol. E aña aki 40 mucha di 5de klas di Colegio San Hose a ricibi e bukinan di RBC su Country Manager Sr. Pierre Rafini.
E buki cu a wordo regala na e studiantenan ta titula “Super wela den coma / Superoma in coma”, scibi door di Fred Diks den Papiamento y Hulandes, y esaki ta ilustra door di Rudyomar Leysner. Colegio San Hose ta e prome scol elementario na Aruba cu un curriculum multi-lingual y e skol a cabi haya un biblioteca nobo. Esakinan te motibonan principal pakico RBC a scoge e skol aki pa haci donacion e aña aki.
Sr. Rafini a bisa: ”Nos ta honra y contento di por haci donacion di e bukinan aki na e scol. Cu e contribucion aki nos ta duna significacion na RBC su compromiso pa yuda comunidadnan prospera. Nos ta spera cu e muchanan haci bon uzo di nan, paso lesamento ta forma un parti hopi importante di nos educacion y desaroyo di nos futuro generacion. Mas nos lesa, mas sabi nos ta bira.”
Durante e evento e muchanan a expresa nan entusiasmo y a demostra nan capacidad di por domina diferente lenguahe. Nan a bisa cu e buki bi-lingual aki lo yuda nan mehora nan Hulandes, paso nan por busca e palabra cu nan no ta compronde den Papiamento. Varios mucha a lesa algun storia cortico cu nan mes a scibi na ingles. Nan juffrouw Annelies a comenta: “Danki na e sistema nobo aki di educacion, nos muchanan ta hopi mas expresivo y tin un miho comprendemento di otro lenguahenan mane Hulandes y Ingles. Nan tambe gusta lesa y scibi hopi mas compara cu mi studiantenan di algun aña pasa. E buki aki ta yuda nos masha hopi mes paso e ta scibi den dos idioma pues e muchanan por compronde tur cos miho.”