RBC Royal Bank ta sponsor di Aruba Little League ya pa 11 aña y ta sigui sostene e liganan. Diamars ultimo 9 di Mei 2017, RBC a firma contrato di sponsor cu Aruba Little League un biaha mas. E presidente Rhudy Donata como tambe otro representantenan di e diferente liganan tawata presente hunto cu e Country Manager di RBC Royal Bank (Aruba) N.V. unda durante un encuentro cu prensa na oficina principal di RBC na Italiëtstraat a firma e contrato.
“Nos ta super orguyoso di nos muchanan di Aruba Little League cu durante e temporada 2016 a logra diferente titulonan na entre otro Puerto Rico, Virgin Islands, St Croix y Panama. Un aña atrobe exitoso cu a duna Aruba y RBC mas atencion den Caribe y a pone Aruba haña atencion mundialmente atrobe. Dor di forma parti di e seleccion di League, e formashon, e disiplina y e compromiso di e hobennan ta yuda forma cuidadanonan ehemplar y lidernan pa futuro. Asina nos ta yuda comunidad prospera, paso esey ta para central den e asercamento y sosten di RBC pa Aruba Little League”, segun Sr. Rafini.
Sr. Donata di Aruba Little League a bisa: “Nos ta sumamente contento cu RBC su apoyo consistente como un patrocinado principal. Cu e apoyo e banco ta yudando hopi hoben cu ta practicando e deporte di baseball. E filosofía di Aruba Little League ta cuadra cu e filosofía di e banco: desaroya metanan pa nos hoben, y traha pa crea oportunidadnan pa yuda forma un basis fuerte pa nos islanan di Corsou, Aruba, Boneiro y Sint Maarten.
E contribucion (sponsor) di RBC ta destina, entre otro, pa cubri gastonan relaciona cu representacion den exterior como tambe uniform.
Rafini a conclui cu RBC ta sumamente contento cu e colaboracion cu Aruba Little League y ta desea nan hopi exito den e preparacion pa nos muchanan pa cu e campeonatonan venidero.