Diabierna algo prome cu 4 or marduga central di polis ta keda informa cu tin personanan den un van blanco lo ta bahando cantidad di caha di klapchi na un cas den Grenadaweg. Polisnan di biaha a mobilisa pa e sitio y a rondona un cas tabata tin hende paden pero no por a drenta. Cu ordo di fiscal mester a drenta e cas, mientras cu tabata warda a canta otro bingo. Holo di marihuana a dal e oficialnan y na un adres pega cu unda tin e cahanan di klapchi horta ta topa cu plantacion grandi. Esaki a pone cu a mobilisa mas polis, departamento narcotica, hefe di polis presenta. Mientras e polisnan ta wardando e van blanco a presenta y cuminsa core duro drenta e caya ey banda y personanan a sali na careda pa polis. A logra pone man riba un di nan.
Manera Fiscal di Ministerio Publico a presenta a duna ordo pa drenta ambos cas y aina detencionnan a cay. Cuatro persona a keda deteni. Durante listramento den e cas a haya cantidad di klapchinan horta, flatscreen, pañanan cu label ainda na nan y basta articulo electronico probablemente procedente di ladronicia.
Den e caya St Vincentweg durante listramento a bin haya cantidad di matanan di marihuana pafo di e cas. Conhuntamente cu fiscal, recherche di Oranjestad, y departamento di crimen organisa y coleganan di diferente districto a haci e listramento den e apartamentnan na ambos adres pega cu otro. Manera a caba cu e dos adresnan a bay bishita algun adres den Tarabana Residence cu lo ta pertenence na sospechosonan cu a huy, y na Caya Solo a topa cu cantidad di cosnan horta.