Raul Castro a anuncia su retiro di e poderoso puesto di prome secretario di Partido Comunista, e unico partido permiti riba e isla. Esaki ta un puesto cu a dun’e mas poder cu e gobernante Miguel Diaz-Canel.
“Pa loke ta mi persona, ta conclui aki mi tarea como prome secretario di comision central di PCC cu e satisfaccion di a cumpli y cu confiansa den e futuro di e patria,” Castro a bisa durante e informe central di congreso.
Dialuna Castro lo bandona e puesto oficialmente cu eleccion di e directiva nobo.
No ta mucho cla ainda kende lo reemplas’e den e puesto, aunke declaracionnan anterior di dje den Congreso ta indica cu esaki por ta Miguel Diaz Canel, actual gobernante di e pais.
Lidernan di e Partido Comunista na Cuba awe a cuminsa cu un evento di cuatro dia den cual a spera e anuncia di retiro di Castro for di politica, mientras cu e regimen cu su ruman a cuminsa mas cu seis decada pasa ta enfrenta un crisis economico pisa y un creciente tension social.
Castro na apertura di e congreso a bisa cu “e desaroyo di economia nacional” ta awendia, hunto cu e “lucha pa paz y firmesa ideologico”, un di e “principal misionnan” di Partido Comunista. Den otro parti di su presentacion, el a ataca e tendencia importador di e pais, cu ta compra mas di 2.000 miyon dollar na cuminda den exterior, pa falta di produccion local.