Banco Central di Aruba (BCA) a publica su Operational Report 2017. Den e publicacion aki BCA ta presenta un resumen di su mandato y su obhetivonan principal manera stipula den e Ordenansa di Banco Central, como tambe su marco strategico pa implementa su plan strategico “Bela yen: Nos Plan Strategico 2016-2020” (Bela Yen). Den e raport anual aki tambe ta subraya e desaroyonan mas importante den e sector monetario, e sector financiero, como tambe e sistema di pago, hunto cu e actividadnan operacional principal ehecuta door di BCA durante 2017. Adicionalmente, e raport ta contene un resumen financiero relaciona cu e operacion administrativo di BCA den 2017.
Algun di e desaroyonan mas importante cu a tuma luga den 2017 ta como lo siguiente:
- Un logro importante pa BCA ta e lansamento formal di su plan strategico “Bela Yen”, den cual BCA ta delinea su ambicionnan strategico como tambe e resultadonan planea pa e periodo te cu 2020.
- Den e cuadro di e maneho monetario, e Comision di Maneho Monetario (CMM) di BCA a reuni shete biaha durante e aña pa revisa y analisa e indicadornan monetario y economico pa asina evalua ahustacion di su instrumentonan monetario, si desaroyonan economico rekiri tal accion. Durante e reunionnan menciona, e CMM a dicidi di no trese cambio den maneho monetario di BCA, manteniendo e tasa di “reserve requirement” na 11.0 porciento en bista cu e indicadornan monetario y economico a keda na un nivel adecua durante aña.
- E reservanan internacional di BCA a permanece riba e nivelnan apropia, apoyando asina e regimen di tasa di cambio fiho di nos florin cu e dollar Mericano.
- Ehecucion estricto y consistente di e ley- y regulacionnan di supervision durante transcurso di añanan a contribui na mantencion di un sistema financiero stabiel, cu likides adequado, y sano. A sigui reforsa e marco regulatorio, entre otro, cu introduccion di leynan, regulacionnan y reglanan general di supervision nobo y/of revisa.
- E posicion financiero di BCA a keda solido. E entrada principal di BCA, cual ta e ingreso genera for di e portofolio di inversion di divisa di BCA, a subi considerablemente, reflehando e desaroyonan positivo riba e mercado financiero global. BCA a ehecuta un maneho di inversion prudente pa provee suficiente divisa pa e sector bancario y gobierno di Aruba, como tambe pa preserva su capital inverti. Di otro banda, e crecemento di gastonan di BCA a keda modera como resultado di e maneho estricto di gastonan cu BCA ta aplica.
i