E ‘werkgroep’ di maneho di desperdicio a entrega rapport final na Minister cu ta contene consehonan y plan di accion. E rapport ta traha a base di e tareanan cu e grupo a haya december aña pasa ora cu e grupo a wordo instala, consehero di Ministerio di Infrastructura y Medio Ambiente Robert Kock ta splica
E ultimo simannan y dianan tabata encera basta reunion y presentacion unda cu a acumula basta informacion tocante e posibel solucionnan a termino corto, medio y largo. E compilacion di posibel solucionnan ta encera leynan actual, leynan cu mester bin ainda, posicion di Serlimar entre otro. ‘E ta un rapport basta amplio y integral, pa cual ta spera cu e informacion por wordo uza pa trece solucion pa e maneho di desperdicio aki na Aruba,’ sr. Kock a enfatisa.
Si amplia un poco riba e contenido di e rapport sr. Kock ta splica cu e opcionnan a base di termino cortico ta cu e ‘landfill’ lo wordo cera mas pronto cu ta posibel y cu sushi ‘dimas’ lo mester wordo manda otro caminda. Mientrastanto cierto sushinan lo mester bay Parkietenbos, sinembargo esaki lo mester tuma luga den un forma cu e ta trece menos molester cu ta posibel pa bisiñanan y trahadonan.
Siguientemente
E proximo procesonan cu mester encamina ta cu, Minister awor lo mester repasa e rapport hunto cu Ministerio completo, pa por tuma un decision a base di e opcionnan cu tin. Consecuentemente lo mester bin cu proceduranan y negociacionnan pa wak kico por yega na dje pa loke ta solucion pa maneho di desperdicio y e forma cu ta procesa desperdicio.