VANCOUVER, B.C., Canada – E rapper Canades Jon James, a muri durante e filmacion di un video musical na momento cu’n stunt ariba un hala di avion a bay robes. E tabata tin 34 aña.
Durante un video musical na Vernon, British Columbia, diasabra, e rapper, cual nomber completo ta Jon James McMurray, tabata canando ariba e hala di e Cessna durante pleno vuelo.
El a cana bay na e punto extremo di e hala, y esaki a pone cu e avioneta a dal un spiral for di control, segun su management team a informa.
“Jon a tene na e hala di e avion te ora cu e no tabata por mas y pa ora cu el a laga bay, e no tabata tin tempo pa habri su parachute. El a impacta causando su morto instantaneo”, Ryan Desrochers di e management team a bisa den un comunicado.
E piloto tabata por a controla e avioneta y a aterisa bon. No tabata tin heridonan, segun informenan.
Segun su management team, Jon James tabata un skiedo profesional, pero a laga e sneeuw atras pa e studio musical despues di varios herida, incluyendo lomba y hilchi pia kibra.
“El a muri durante e filmacion di e proyecto ariba cual e tabata trahando ariba dje pa lunanan largo. El a train intensivamente pa e stunt aki”, su management team a bisa den un statement.
E ta laga atras su casa, su mayornan y un ruman homber.
“E tabata yena tur hende su alrededor cu positivismo, y nunca a papia malo di otro persona. E tabata tin sigur sigur un curason di oro”, e comunicado a bisa.
