E barco petrolero FSO Nabarima cu 1.3 miyon di bari di crudo ta cerca di hundi y crea un mega catastrofe ecologico den costanan di Venezuela y Trinidad Tobago, e ta hankra den e golf di Paria.
Riba rednan social por tuma nota di un informe unda ta referi na e situacion aki andando pa algun tempo caba pero cu recientemente ta empeorando. Lama Caribense por bira un ‘lama morto’ si e 1.3 miyon di bari di petroleo conteni akinan mester derama den lama. E desaster aki lo ta uno grandisimo cu lo surpasa nos imaginacion. Masnoticia a tuma contacto cu Bureau Rampenbestrijding Aruba, caminda cu sr. Rino Hermans por a confirma na Masnoticia cu Rampen Bureau a pone esaki riba monitor diasabra cu a pasa, pero nos no a haya mas informacion te cu ainda riba esaki.
Di informacionnan cu nos por a compronde, E Nabarima tin un capacidad di 1,3 miyon di bari di crudo y ta mara na e campo costa pafo di Corocoro den e Golf di paria pa casi 10 aña caba. E campo ta pertenece na PetroSucre, un empresa opera conhuntamente cu Petroleos de Venezuela.
Mas o menos un luna pasa e noticia aki a bini dilanti unda a bati alarma pa situacion fastioso cu e barco a enfrenta di cual a wordo soluciona, pero awor ta papiando di problemanan mas grandi cu por a tuma nota di dje.