DEN HAAG – Na Gabinete di Aruba a tuma lugar un anochi cu dos charla, cual evento a conta cu un interes hopi grandi. Un di e charlanan tabata na encargo di Ramon Todd Dandaré y e otro charla e wordo duna door di Adi Martis.
Ramon Todd Dandaré su charla a hiba como titulo “Dos taki di e mesun palo: relacion entre e structuranan gramatical di Caboverdiano y Papiamento”. Tabata dr. Efraim Frank Martinus (dfm) como prome linguista Antiano cu a bisa cu tin un relacion hopi cerca entre e structura di e idioma Caboverdiano y Papiamento. Todd Dandaré a haci un investigacion den cual el a haci comparacion entre e gramatica di e dos idiomanan aki. Durante di su presentacion Ramon Todd Dandaré a duna un splicacion extenso di e comparacionnan. Tambe el a mustra cu Cabo Verde, ta consisti di diferente isla, pero parti den dos region. Cada region conoce un variacion diferente di e idioma Caboverdiano: esun cu ta wordo papia na Sao Vicente y esun na Santiago.
Adi Martis a tene un charla bou di e titulo Miho conoci como…: nomber di cariño na Aruba. Martis ta trahando mas cu cinco aña na un buki riba historia di Aruba. Durante di su investigacion den archivonan el a ripara cu nomber, famnan y nomber di cariño y bijnaamnan den transcurso di historia a cambia. El a colecciona un lista di nomber y a purba di busca e rason y dicon di e cambionan. Durante di su charla na Gabinete di Aruba, Adi Martis a presenta e resultadonan provisorio di su investigacion. Su charla a trece memoria na hopi di e hendenan presente cu a lanta cu cierto nombernan, pero sigur algun “bijnaamnan” cu ta conoci bou di nos Arubianonan.