E musulmannan di Medio Oriente a cuminsa diasabra, 27 di Mei, e prome dia di luna sagrado di Ramadan mey mey di e violencia, aunke cu un hilo di speransa pa e avancenan den e lucha contra terorismo, pues e Yihadista Estado Islamico (ISIS), ta perde cada dia tereno den su bastionnan di Irak y Siria.
ISIS ta cada biaha mas cera den e ciudad septentrional di Mosul, nort di Irak, pasobra ya e ta ocupa solamente un 10 porciento di e parti occidental di e urbanisacion, tras di perde e resto ocupa desde cu a cuminsa e ofensiva di e forsanan Iraki October ultimo.
Na Januari, unidadnan castrense a recupera e parti oriental y eynan e famia di Naual Fadil, lo pasa nan prome Ramadan, desde tres aña pasa sin presencia di e Yihadistanan.
“Ramadan di e aña aki lo ta diferente cu e tresnan anterior, caminda cu nan tabata bao di e dominio di ISIS, cu a provoca cu Ramadan a perde tur su balor,” Fadil a sigura na EFE.
Su famiam, cu ta biba den e bario oriental di Al Faisaliya, ta prepara pa ricibi e luna cumprando cuminda y bebida, aunke nan ta keha di e falta di servicionan basico den e urbanisacion.
Na Siria, e Yihadistanan ta atrapa den e interior di nan capital “de facto,” Al Raqa, pa e avance di e Forsanan di Siria Democratica (FSD) – un aliansa arma lidera pa milicianan Kurdo – den nan ofensiva.
Mohamed Jaled al Shaker, vocero di e Forsanan di Elite Siria, un milicia di tribunan Arabe di e provincianan di Al Raqa y Deir al Zur, cu ta colabora cu FSD, a afirma den un combersacion telefonico cu EFE cu “respecto na nos operacionnan den Ramada, esaki ta un campaña contra terorismo, cu loke tambe ta un deber sagrado pa musulmannan.”
Pa e motibo ey, el a delanta cu e ofensiva contra EI na Al Raq, cu ta conta cu e apoyo riba e tereno di efectivonan special di Merca, no lo bay detene durante e luna sagrado aki.
Den e ultimo siman, e milicianan a tuma tur pueblo cu tabata keda den mannan di e radicalnan den mita oriental di e region Al Raqa y a situa na 3 kilometer di su capital for di e lado oost.
Apesar cu e hilo di speransa aki den lucha contra di violencia, tin paisnan manera Yemen, cu no ta vislumbra un final den e conflicto cu ta azota e teritorio, ademas di e hamber y colera cu a brota den e ultimo luna y cu a caba cu e bida di mas di 300 persona.
Amyad y su famia tabata biba den e ciudad di Taiz (zuidwest), asedia pa rebeldenan Huti, y semper nan tabata pasa Ramadan eynan, aunke e aña aki nan lo pasa como desplasado.
“Nos a biba Ramadan aña pasa den nos cas y riba nos tera, entre nos famia. Y e aña aki nos a wordo desplasa pa prome biaha,” el a sigura na EFE.
El e añadi cu nan a sobrevivi dos aña di e conflicto na Taiz, “pero e combatientenan a acerca nos bario y nos a dicidi di sali for di e ciudad.”
E conflicto na Yemen a explota ora cu e rebeldenan a ocupa e capital na 2014 y otro pronvicianan di e pais y a recrudece na 2015 ora cu e coalicion militar, lidera pa Arabia Saudita, a interveni directivamente na fabor di e forsanan leal na e presidente Abdo Rabu Mansur Hadi, e unico reconocido pa e comunidad internacional.
Di otro banda, na Egipto a cancela e eventonan di Ramadan den solidaridad pa e atake perpetra diabierna contra un autubus unda cu a muri por lo menos 29 cristian copto.
“Mi ta hopi tristo di loke ta pasando cu nos., No tabata un bon inicio di Ramadan ya cu e ta duna nos e sensacion cu morto por yega facilmente na cualkier persona, sea cristian of musulman,” Roaya, un hoben Egipcio procedente di e ciudad costera di Damieta, nort di Egtipo, a afirma na EFE.
Ramadan, ta un luna di gran importancia y simbolismo pa e musulmannan, caminda cu e creyentenan ta abstene na come, bebe, huma y mantene relacionnan sexual desde salida te cu bahada di solo.
Segun e tradicion Islamico, den e luna aki, e profeta Mohamed a cuminsa ricibi revelacion di e buki sagrado, e Coran.
E cumpliento di e yuna ta uno di e cinco pilarnan di Islam y solamente ta keda extentonan na muhenan na estado of cu menstruacion, enfermonan, mucha y biaheronan.
Fuete: www.infobae.com