E organisacion “International Order of the Rainbow for Girls”, miho conoci como Rainbow, a ser funda na aña 1922 na e estado di Oklahoma y den e transcurso di añanan, e organisacion aki a crece y bira uno mundialmente conoci. 15 aña pasa e organisacion aki a wordo funda na Aruba, cu e meta di siña mucha muhenan for di un edad hoben e importancia di yuda esnan den necesidad, duna servicio na nos comunidad y haci trabou di voluntario. Tambe e organisacion aki ta yuda e mucha muhenan desaroya nan mes y tuma rolnan di liderasgo na un edad relativamente hoben.
Durante e ultimo 15 añanan diferente proyecto a wordo ehecuta y adicionalmente e muchanan di Rainbow a contribui den proyectonan di otro organisacionnan rond di nos isla. Actualmente Rainbow ta conta cu un total di 50 miembro.
Nos kier gradici e comunidad en general pa nan apoyo brinda durante e ultimo 15 añanan pero muy en especial nos sponsornan di “Eastern Star”, Lodge el Sol Naciente y tur mayornan cu a kere den nos y a sostene nos e ultimo 15 añanan. Un danki y pabien especial ta bay pa tur nos miembro y ex miembronan di e ultimo 15 añanan; boso trabou duro, determinacion y amor pa nos comunidad a yuda nos yega asina leu.