Awe den oranan di mainta tempran a bati alarma pa un boto descubri na cabes di Aruba.
Mesora a mobilisa diferente unidad policial cu a yega rapidamente na e sitio. Na e sitio sinembargo no a topa ningun persona mas. Si a topa cu un boto cu a pega riba e baranca na cabes di Aruba.
A logra saca e boto mientras cu investigacion a cuminsa. Na e sitio no a haya nada special pero tur cos ta indica cu e grupo mester a drenta den oranan di marduga sin cu e radarnan a capta algo di e movecion.
Manera por mira riba e foto, e boto (Big Kaiser) aki ta uno basta basta grandi, di mas o menos 26 pia. Pues sigur mas cu 20 hende mester tabata abordo. Loke ta straño ta cu ayera nochi prome cu mey anochi tabatin un ciudadano a bati alarma.
E ciudadano a bati alarma cu el a mira un luz riba lama, di un boto, pero ta parce cu e patruya no a mira nada, si el a bay na e sitio. Mas straño ta cu Aruba, un isla chikito dorna pa tres radar: Un na Colony, un na Warda di Polis San Nicolas y e otro riba e antenna nobo di TeleAruba. Di otro banda e Departamento cu ta controla costanan di Aruba a caba di haya pick-up di rond di 100 mil florin, pa protege nos isla di entrada di ilegalnan. Ta parce cu tur hende tabata “drumi” ayera nochi. Inclusive e radarnan cu mester ta lanta delaster minuut di dia.