Papiando cu directora di YMCA Aruba, Rachel Croes, e ta splica kico nan como organisacion ta biba cune tur dia cu nos hobennan.
Si wak e situacion na Aruba, tin cu bisa cu en berdad tin hopi problema social riba e tereno di hoben. Por papia temanan cu ta relevante den e ultimo temponan y hopi actual. Por ehempel tin abuso di mucha, delincuencia y criminalidad. Ta bisa si, cu si mira e cifranan, ta mustra cu e ta birando mas y mas y instancianan por ehempel YMCA y otronan, tin cu para fuerte pa esaki y bay wak kico ta e problema, kisas kico ta e origen, pasobra e ta importante pa resolbe esaki. Ta bay traha preventief of bin cu algo cu ta bay pak aan e problema cu tin awor aki. Croes ta menciona cu miho cuminsa traha preventief, mira e origen di e problema, pa asina por termin’e tambe of sikiera baha e porcentahe mas ainda.
Den e muchanan cu ta bin na YMCA, tin mucha cu ta bin cu no ta mustra problemanan social. Tin tambe mucha y hobennan cu ta bin eynan cu berdad tin mas problema social. E por ta problemanan na cas, e por ta muchanan cu no ta haya desayuno, almuerso y cena. Ta haya hobennan cu nan mayornan ta lucha riba tereno financiero. Ta diferente problema cu ta wordo proyecta cu tin den comunidad. Esaki ta wordo refleha na e muchanan ora cu nan bay YMCA.
YMCA ta purba di yuda e hobennan hunto cu diferente otro instancia, manera Kiwanis Palm Beach, kendenan ta yuda cu un donacion cu nan summer camp, unda cu algun di e muchanan por a participa gratis, Croes a splica.