E presidente nobo di Quota Club ta cla pa celebra su 30 aña y pesey e aña aki tin hopi planes pa cual aki Sra. Laurel Romijn ta splica mas di nan proyectonan y eventonan.
Quota Club ta un organisacion di servicio. Parti di e organsacion ta dirigi tur esfuerso pa mehora calidad di esunann menos afortuna di nos comunidad. Specialmente esunann cu problema cu oido y habla, muchanan y hende muhe den dificultad.
Quota ta dedica su mes na area di servicio, esaki nan ta haci na diferente manera. Tur aña ta traha un programa di servicio pa duna un man, unda cu por, na proyectonan di calidad. Tambe ta dedica atencion special na muchanan di Scol Skucha Nos, y ultimo añanan ta dedica tempo na e mucha muhe y mucha hombernan di Centro Ortopedico.
Un biaha pa aña ta distribui tur e fondonan cu nan tin y acumula durante e aña. Quota ta haci donacion pa mas o menos pa 25 instancia social y caritativo pa yudanan pa sigui haci e bon trabao cu nan ta haciendo. Pa haci esaki nan tin nan acostumbrado fundraising anual. Tur locual keda recauda ta bay bek den comunidad.
Den cuadro di nan 30 aña nan ta celebra cu nan Picnic Dansant y e tema ta Perla. Tur persona of comercio cu cumpra un of mas ticket pa evento di Quota ta contribui masha hopi mes, no solamente ta pasa un atardi placentero pero ta un manera excelente pa contribui na mehoracion di calidad di bida na esunnan menos afortuna y na mes momento pasa un rato agradabel, disfrutando di un dushi diadomingo atardi celebrando Quota su 30 aniversario.
Benta di e kaarchinan ta disponibel na tur e miembronan di Quota International Aruba, segun Sra. Lourel Romijn, Presidente di Quota Club Aruba.