Como Presidente, Gwendeline van Trikt-Rojer, e aña aki, tin na encargo di Quota Club Aruba y hunto cu Directora di Servicio, Ivy Simon y Service Committee, e organisacion di e evento aki, cual ta un proyecto cu ta wordo organisa pa mas cu 27 aña caba cu e meta pa concientisa nos comunidad kico kiermen perdida di oido y kico pa haci pa evita e perdida aki.
Cu hopi alegria y entusiasmo van Trikt-Rojer a yama un bon bini na Quota su apertura di “Shatter Silence Week”, “Siman di Kibra Silencio”, specialmente invitadonan di honor, muy en especial, Minister di Salubridad, Dr. Alex Schwengle, y tambe, kende a haci e apertura oficial na Oduber & Kan, cual ta brindando nan cooperacion pa di 5 aña caba na Quota Club Aruba. Y ta pesey ta celebra e hecho aki cu gratitud. Tambe nos a cuminsa cu Siman di Kibra Silencio cu un tremendo Fun Walk y tur den e aspecto di e campaña pa concientisa nos Aruba di “Cuida Bo Oido”.
Quota tabata tin como invitadonan specialmente pa e ocasion aki pa nan haci nan test di oido, nos Cuerpo di Bombero di Aruba, cu tambe semper ta atento y cla pa asisti y brinda nan servicio di un trabou di hopi responsabilidad y peligroso depende di cada circunstancia di calamadidad cu nan tin cu enfrenta y asina na varios ocasion ta wordo exponi y confronta cu zonidonan exceso na nan oido, mientras cu nan ta laborando y tin cumpli cu nan obligacion y tareanan.
A habri e siman di Kibra Silencio bou di Sirene di e trucknan di Brandweer y na un manera expecional pa trece e mensahe mas cerca di nos comunidad.
E presentacion di e bunita Quota banner nobo “Cuida Bo Oido” a wordo introduci na nos comunidad, cu ta ilustra cu ta for di chikito cu nos tin cu cuida nos oido.
Pesey tambe e banner na entrada, cu tin nos hobennan, un baby un persona mayor pa concientisa e generacion, cu perdida di oido no tin discriminacion.
Perdida di oido ta bay sin cu nos mes ta ripara y locual cu a bay perdi no por wordo recupera. E unico ayudo lo ta un aparato auditivo y no ta asina facil pa adapta na e uzo di un aparato asina tampoco. Den algun caso un implante cochlear ta e solucion, pero no ta tur pashent ta bin na remarke pa esaki. Y pakico depende riba un aparato si bo por evita esaki door di cuida y evita zonido cu ta causa daño na bo oido.
Personanan cu no por scucha bon hopi biaha ta isola nan mes pasobra nan no por sigui un combersacion, vooral den grupo hobennan, fuera di isola nan mes, ta haya problema cu nan estudio y ta expresa nan frustracion, cu mal comportacion.
Quota ta preocupa vooral, pa nos hobennan, pasobra mayoria no ta conciente cu zonido mucho duro pa tempo largo ta haci daño y hopi di nos hobennan ta gusta scucha musica demasiado duro sin realisa kico esey kiermen pa ora nan ta mas grandi.
No ta por nada nos a trece nos hobennan den e campaña aki, pasobra ta di chikito e ta cuminsa cu e concientizacion aki pa mañan ora Bo ta grandi Bo tin bo oido. Por mira na e Banner nobo, cu ta propaganda Cuido Di Oido pa tur generacion.
Pesey nos ta encurasha hobennan pa bin haci un test pa haya a con nan oido ta. Quota tabata tin e honor di por a scucha un hoben comparti su storia, su testimonio riba su oido y tambe kico e a haci falta ora cu e no por a scucha bon, y cu despues di su operacion si esey tabata possible, e alegria, su auto estima, su motivacion pa sigui bay dilanti y comparti su storia pa asina tur hoben tuma nan oido na serio.
Mayornan, percura pa Bo yiu tambe tin e oportunidad unico aki pa gosa di su bida y por scucha y disfruta di nos dushi zonidonan.
Claro cu esaki ta conta pa henter nos comunidad tambe, pasobra tin personanan cu ta traha den un ambiente cu hopi desordo of ruido continuo cu tampoco no ta protega nan oido.
Van Trickt por agrega tambe, cu durante un di e eventonan durante sound check, algo a bay robes y a resulta den perdida di oido na un banda.
Pesey e siman aki Quota lo percura pa tur hende tin oportunidad pa controla nan oido y haya resultado mes un momento completamente gratis.
Asina tambe a haya peticion pa un empresa por a brinda e test di oido na su trahadonan, concientisando nan riba cuido di nan oido.
Quota semper ta recorda e hecho di e alegria di mira e prome mucha homber cu a nace cu deficiencia auditivo, y cu a wordo opera na Hulanda cu a logra pa sigui su enseñansa na un MAVO.
Tambe pa prome biaha na September 2011, un grupo di cuater mucha por a wordo opera na Aruba mes y awor si por tende y lo por tin un miho futuro, ya cu nan tambe lo por probecha di nan educacion.
Cada aña atrobe, e oportunidad ta wordo brinda na nos comunidad pa haci e test di oido, pero tambe pa cuida bo oido.
Encuanto e resultado di e testan di Oido, evaluacion lo wordo haci, na final di e siman aki, di e test nan haci pa Quota por tin un record di con e oido en general ta den nos comunidad. Cual evaluacion lo wordo duna despues.
Please yama pa Bo cita y test Bo Oido Gratis pa cortesia di Quota International of Aruba.
Testnan ta wordo duna gratis, durante e siman aki, cu cooperacion di Oduber & Kan, Aruba Hearing Institute y SVB San Nicolas, bel y haci bo afspraak pa bo no keda afor.
Yama pa Bo cita di Test di Oido Gratis na e siguiente localidadnan:
Oduber&Kan, Cayenna Mall: 5824719
Aruba Hearing Institute, Eagle: 5878885
SVB, San Nicolas: 5272732