Quota Club Aruba cu e meta pa contribui y haci e cambio positivo na nos comunidad, a haci posibel cu tur e muchanan di Scol Paso Pa Futuro, por a bay tur den busnan grandi pa celebra nan fiesta di Pasco na Piedra Plat Entertainment Center.
Ta un goso pa mira e sonrisa riba cada cara di e muchanan y e alegria cu nan a disfruta y por a core den bus pa hunto por a yega na nan celebracion di Pasco, cu ta algo hopi grandi y significante pa nos muchanan di Scol Paso Pa Futuro, en especial, y asina por a gosa un mundo di nan Celebracion di Pasco.
E alumnonan conhuntamente cu nan maestronan cu semper ta dedica cu hopi amor y pasenshi na nos muchanan di Scol Paso pa Futuro, a prepara y presenta nan shownan spectacular.
Mester menciona, cu tin hopi talento na e Scol aki y cu tin cu aporta y encurasha nan riba nan talentonan special y bunita; Masha bunita y dushi mes e muchanan a pasa y tin hopi bunita presentacion cu canto, storia, comedia y bailamento di tur e alumnonan di Scol Paso Pa Futuro.
Di parti Quota Club Aruba, Presidente Sra. Gwendeline van Trikt-Rojer junto cu Quotarian, Sra. Mariela Nava-Figaroa, a haci entrega na nomber di Quota Club Aruba, e regalonan y premionan pa tur mucha di tur klas di Scol Paso Pa Futuro y ta felicita nan pa nan bunita presentacion y bunita celebracion, masha pabien!
Cu esaki Quota Club Aruba, ta aporta na nos muchanan di nos comunidad y ta gradici tur esnan cu a yuda y contribui y cu semper ta aporta na Quota Club Aruba na benficio di esnan cu tin mas mester; Masha Danki y hunto nos lo por haci e bunita gestonan aki pa nos comunidad.
Quota International of Aruba ta un organisacion boluntario di ehecutivonan femenino y cu ta dedica na mehora calidad di bida di esnan menos afortuna den nos comunidad, specialmente esnan cu problema di oido y habla y tambe ta sostene hopi programanan pa hende muhernan den dificultad y muchanan desafortuna. Alabes Quota ta hiba e mensahenan di concientisacion den nos comunidad por medio di proyectonan organisa pa hoben na scol, seminarionan pa nos comunidad y en general trahando hunto pa brinda un miho calidad di bida.
Nos ta desea na henter nos comunidad, di nos dushi Aruba, un Bon Pasco y un Feliz Aña Nobo y cu hopi Bendishon, amor y paz reina den tur hogar.