Qredits durante pandemia a scoge pa no para na banda y a sigui yuda empresarionan hoben

Despues cu a lanta Qredits cuatro aña pasa, awe e ta stabil den su mesun sede riba Vondellaan, mucho mas amplio cu na inicio, y sirbiendo empresarionan hoben di Aruba.

Oliver Viera ta e cara awe di Qredits, un hoben profesional cu ta e miho persona pa compronde y stimula hobennan cu kier cuminsa nan mesun negoshi. “Nos t’ey,” el a bisa, “pa yuda e empresarionan hoben dal e siguiente stap, sigui crece of cuminsa cu nan idea nobo.”

Den e temporada desde inicio di pandemia, Qredits a dicidi cu nan no por para na banda y mira con e situacion lo desaroya. A scoge pa ta pro-activo y yuda nan clientenan. Den e tempo ey a ofrece e “overbruggingscrediet” cu a yuda hopi cliente wanta e slanan relaciona cu e pandemia. Y awe e prome clientenan di tres pa cuatro aña ta cuminsa mira e resultadonan pa nan compania tambe.

Viera ta hopi contento cu nan logro te cu awo, brindando ayudo na mas cu 250 local por medio di un poco mas di 275 prestamonan local. Ta trata di comerciantenan cu Qredits ta guia durante henter e proceso pa nan tin exito. Nan ta bay mas leu, y a brind curso y charlanan na Enseñansa pa Empleo y na EPI pa prepara e comerciantenan di futuro pa nan tin tur e hermentnan necesario di circunstancianan den futuro.

Qredits no ta mira solamente e documentonan so pero ta busca e potencial den cada cliente. P’esey nan edificio ta ekipa pa ora e hoben yega ey, nan ta sali hopi mas motiva. “Den hubentud tin hopi potencial,” el a bisa. E idea ta pa acopla e dos aspectonan pa yuda nan cana e caminda. Qredits no ta solamente placa, pero e guia, educacion y apoyo cu ta brinda, cu ta diferencia nan di otro institutonan.

Apertura oficial di Qredits den nan sede nobo den Vondellaan, dilanti Colegio Arubano, a tuma luga diamars atardi.

 

Comments

comments