Recientemente, Edsel Lopez y Kimberly Maduro di PwC a duna un presentacion y splicacion na studiantenan di tercer aña di IPA tocante spaar placa y dicon e ta importante pa educa muchanan riba esaki.
E presentacion aki a wordo duna den cuadro di diferente workshops cu studiantenan di tercer aña di IPA a forma parti di dje, na cual PwC tambe a wordo invita pa duna un presentacion tocante e topico di spaar relata na nan proyecto ‘Earn Your Future’.
Edsel Lopez, partner di PwC Dutch Caribbean a habri e presentacion dunando algun cifra statistico, entre otro Edsel a duna di conoce cu 43 porciento di mayornan ta di opinion cu mas por wordo hasi pa siña muchanan tocante placa. Aki Edsel ta mustra claramente cu tin un necesidad pa lesnan riba e topico aki y ta pa es motibo cu a introduci PwC su proyecto ‘Earn Your Future’ cu ta cubri e topico aki.
Edsel Lopez a sigui splica con ‘Earn Your Future’ a cuminsa y tambe con esaki a bay den practica. E prome aña tawata un pilot caminda cu hunto cu SKOA a traha riba e lesnan aki pa asina nan por ta mas efectivo. Awor PwC tin 4 aña dunando e lesnan aki na muchanan di skolnan basico pa asina siñanan pa den futuro nan por haci mihor desicionnan tocante placa y con pa trata cu esaki.
Di otro banda, Kimberly Maduro, Brand & Communication Officer pa PwC Dutch Caribbean a splica mas tocante e planeamento di e lesnan aki y con cada dia di ‘Earn Your Future’ ta bay den practica. Tambe, Kimberly Maduro a splica mas tocante e obhetivo di e lesnan aki cu no ta solamente concientisacion, pero tambe comparti conocimientio cu e muchanan cu na nan turno lo comparti esaki cu nan mayor y famianan.
PwC ta contento di por a contribui cu IPA dunando e presentacion aki y por spera mas colaboracion den futuro di PwC hunto cu IPA.