Durante un conferencia di prensa yama pa Pwc, Edsel Lopez a splica riba un evento cu lo tuma luga e siman aki cu ta Big Data On a Small Island.
E idea aki a cuminsa dos aña pasa y por bisa cu awo ta hopi satisfecho con e proceso a bay y unda cu nan ta para cu e evento cu lo bay tuma luga na Aruba diamars. Big Data ta un terminologia cu ta wordo uza pa describi un cantidad inmenso di informacion digital.
Cada biaha cu informacion di persona wordo hinca den un computer, e computer ta keda warda e informacion aki y despues esaki por wordo uza sea pa un bon causa, un causa comercial y hasta causanan investigativo. Combina data, o sea e informacion di diferente sistema, awendia ta brinda companianan posibilidad pa mehora calidad di bida. Por ehempel door di combina informacionnan, companianan por deduci cual ta e factornan cu ta haci cierto malesanan bao di cierto grupo di hende, ta existi.
Te cu un decada pasa, mayoria di informacion di mundo tabata wordo produci pa cientifico, industria y servicionan administrativo. Esaki ta cambia radicalmente door di mobile technologie. Celular a manera bira un computer chikito den hende su man. Google, Facebook, Instagram ta cosnan cu hende tin, cu ta produci hopi data, informacion, di un persona.
E data ta algo poderoso, pero ta eticamente neutral. Nos mester scoge con e ta wordo uza. Sea den algo positivo pa drecha e calidad di bida of wordo uza pa kibra privacidad, grupo di hende of comunidad.