Riba Dia di Betico, Comision Celebracion Dianan Nacional (CCDN) a hinca un programa extenso den otro pa rindi honor na Libertador Betico Croes riba su fecha natal.
E celebracion a cuminsa cu e tradicional ceremonia protocolario cu a conta cu presencia di Gobernador Boekhoudt, Presidente di Parlamento, ministernan, miembronan di Parlamento y varios miembro di famia Croes, principalmente e generacion mas nobo.
Ofrenda floral a wordo haci door di Presidente di Parlamento drs. Mervin Wyatt Ras y Griffier mr. Herman Hek; representando Gobierno Prome Minister Mike Eman hunto cu Secretaria di Conseho di Minister sra. Nicole Hoevertsz; representantenan di famia Croes , cinco nieto di Betico Croes; Gilberto (Beto) Croes, Mario Croes, Lara Croes, Thiara Croes y Francesca Saladin y como ultimo representante di Fundacion Betico Croes, Sra. Evelyne Wever -Croes y Sr. Maikito Croes.
Yiu homber mayor di Betico Croes, Glenbert, a hiba un discurso den nomber di famia, unda palabranan manera union y patriotismo a resalta, sigui pa Prome Minister Mike Eman. Despues a sigui un poesia di Tai Kong Trimon; baile di Club di Movimiento y himno di Aruba canta pa Jorzhino Schlipken Croes cu a cera e parti protocolario, hunto cu cancionnan presenta pa EttyToppenberg.
E manifestacion cultural a cuminsa pa 7’or di anochi cu musica di Caha di Orgel Bucuriu di Nai Felicia y e anochi a finalisa cu musica di Tsunami cu a pone e publico baila. Entre e dos actonan aki tabatin presentacion di baila, grupo di fluit y canto.
Tabatin e tradicional tentnan unda cu tabatin pasabocanan tipico na benta. Un anochi unda e pueblo a uni pa celebra Dia di Betico.