Aruba Food & Beverage Association, representa pa Miriam Dabian, ta complace pa invita cordialmente tur e habitantenan di Aruba, pa participa den e di tres edicion di nan exitoso job fair. E evento aki lo tuma luga dia 12 di juni proximo den Renaissance Convention Center, y ta priminti pa ta un oportunidad unico pa esunnan cu ta busca oportunidad laboral den e prospero industria di alimento y bebida di e isla.
Den un conferencia di prensa cu a tuma luga na EPB Hato diamars, Dabian a comparti detaye emocionante riba e job fair y su importancia pa comunidad. “E job fair ta diseña specificamente pa brinda nos miembronan e oportunidad pa promociona y ofrece trabao disponibel den e industria,” Dabian a splica. “E ta un plataforma invaluabel pa contecta e empresnan y e buscadonan di trabao den un ambiente dinamico y colaborativo.”
E evento lo conta cu participacion di diferente institucion, incluyendo EPB, Enseñansa pa Empleo y SVb, cu lo ofrece informacion relevante y recurso tanto p’e studiantenan como p’e profesionalnan en busca di oportunidad laboral nobo. “Nos ta comprometi na ofrece mas di 500 trabao den e job fair aki,” Dabian a enfatisa. “E aña aki nos a duplica e cantidad di stand compara cu aña pasa, cu 34 stand disponibel p’e buscadonan di trabao.”
Fuera di e oportunidadnan laboral, e job fair tambe lo ofrece un serie di evento y actividad emoconante durante henter dia, incluyendo premio y sorteo cada ora p’e participantenan. “Nos kier p’e job fair ta atractivo y accesibel pa tur,” Dabian a agrega. “Ta un oportunidad unico pa conoce di cerca e vibrante industria di food & beverage di Aruba y explora e diferente oportundiadnan di carera disponibel.”
Di su parti, Richinel Stampel di DPL a destaca e importancia di colabora cu e comunidad pa promove trabao local den e industria di Food & Beverage. “Semper nos tin vacatura disponibel den F&B. Bin awo y bo lo haya trabao.”
Cu un variedad di oportunidad laboral disponibel y actividad emocionante planifica, e di tres job fair di Aruba Food & Beverage Association ta priminti ta un evento tremendo pa tur cu ta busca pa avansa den nan carera profesional den e industria di alimento y bebida riba e isla. No perde e oportundiad aki di networking y crecemento profesional.
