Pueblo, cera conoci mas cu e grupo Tipico Hoben y Talentoso

Minister Sra. mr. Xiomara Ruiz-Maduro den un comunicado di prensa a trece dilanti cu nos tin hopi talento bou di nos hobennan, ta nos como adulto mester duna mas oportunidad na nos hobennan pa nan trece nan talento y conocemento dilanti mirando cu nan ta creciendo y hayando popularidad na unda cu nan ta bay presenta.

Segun e mandatario nos hobennan mester wordo brinda e oportunidad tambe pa mustra nan bunita trabao cu nan ta desplega. Den e mundo di adulto cu tanto tipico y tanto banda no ta focus riba nos hobennan cu ta e futuro di mañan. E mandatario encarga cu Cultura ta comparti un bunita mensahe ricibi cu su persona a ricibi di un grupo di Dande Hubenil:

“Excelencia minister di Finansas y Cultura e aña aki atrobe e grupo di dande hubenil di aña pasa, cu minister a saca nan potret ta coriendo paranda. Nos lo kier pa Su Excelencia cera conoci cu nan mas di cerca. Akinan mi ta presenta e grupo Tipico Hoben y Talentoso. Consistiendo di hobennan activo riba e tereno cultural. Nan ta coriendo Dande pa 4 aña caba. Nos ta hobennan cu nan edad ta varia di 12 aña pa 18 aña. Nos ta activo riba diferente tereno musical manera Festival di Dande, Pasco hasta Carnaval. E integrantenan ta domina diferente instrument. Tin algun di e integrantenan tin diferente produccionnan di cantica di Pasco, Dande y Carnaval y hasta tin algun ta aparece riba Youtube. Y nos cantantenan a ricibi premionan riba e diferente terenonan musical si no ta pa canticanan di Pasco ó den e festivalnan. Nos ta sumamente activo y nos ta ricibiendo hopi acogida e ultimo añanan aki cerca pueblo cu kier sa mas di nos. Hopi hende kier conoce nos mas di cerca. Nos ta hobennan cu amor pa nos cultura y un di poco nan cu ta desplegando den un grupo di dande hubenil”.

E grupo di Dande Hubenil ta consisti di e siguiente hobennan ta:
Ashton Maduro 12 aña riba tambu, Xyqu Croes 18 aña riba cuarta,
Ethan Croeze 14 aña riba fio, Jorzinho Schlipken Croes 14 aña riba wiri y nos Rey di Dande Hubenil 2018 Xenon Daal.

E grupo aki ta wordo sosteni dor di mayornan mes di e integrantenan. Cu e comunicado aki Minister Ruiz-Maduro aparte di apoya, motiva y brinda mas oportunidad na e grupo aki, minister ta desea pa Aruba cera conoci cu nos talentonan hoben mas di cerca.

Comments

comments