Na prome luga CBN kier a felicita Aruba henter cu e celebracion di nos dia di Himno y Bandera. Ta pa di dos biaha cu CBN ta organisa un actividad, Fiesta Arubiano, special pa celebra un di nos dianan nacional mas importante. Mirando cu ultimo añanan no tabatin actividad den nos dushi bario di Noord, nos como Directiva di CBN a mira como nos tarea pa organisa un actividad pa hunto nos por celebra e dia aki.
Alabes nos a dicidi cu tur aña nos ta bay entrega e premio Meneer Ovito Tromp. Un premio cu mester duna balorashon na trabounan boluntario di un persona pa of den nos bario di Noord y e trabou aki mester a of ta contribui na na desaroyo di nos bario of un grupo di persona den nos bario. Alabes CBN ta spera cu e premio Meneer Ovito Tromp lo forma un incentiva pa otronan tambe por cuminsa haci trabounan boluntario y aporta na desaroyo di nos bario.
Dia di Himno y Bandera durante Fiesta Arubiano CBN a otorga e Premio meneer Ovito Tromp na dos boluntario cu un trayectoria amplio y cu un aporte imenso pa nan bario di Noord, esta srs. Isnardo ‘Chonai’ Faro y Julian ‘Eli’ Pers. Den un comunicado separa nos lo elabora ariba e trayectorio amplio di ambos ganado di e Premio 2017.
Directiva di CBN kier gradici e Comision Premio meneer Ovito Tromp. Un comision cu a traha independientemente y cu tabata tin e tarea pa presenta e persona(nan) cu lo ricibi e Premio Meneer Ovito Tromp. E comision ta consisti di sra. Glenda Croes-Tromp cariñosamente yama Juf. Glenda, sra. Lupita Gil y sr. Tito Sapuana. Un danki di curason pa boso aporte y tarea desplega.
Alabes CBN kier gradici sr. Frank Croes kende un biaha mas a traha e Premio meneer Ovito Tromp. Algo unico y cu ta simbolisa e tres areanan den cual meneer Ovito mas a destaca, esta como educador, musico y dirigente. Di curason masha danki Frank.
Otro gradicimento ta bay pa CedeAruba cu biaha mas a yuda financia e gastonan pa CBN por realisa e actividad Fiesta Arubiano. Tambe CBN ta yama danki na Serlimar cu a sponsor CBN cu extra drum pa e día aki.
Por ultimo un danki na nos cuerpo di boluntario campeon, tur e personanan cu a dicidi di bin bou di un di e tentnan pa bin ofrece nan producto y cumindanan dushi y sigur no menos importante tur mc, artista, grupo di baile, agrupacion, declamado, caha di orgel, cu a aporta na e actividad aki. Boso ta campeon!
Di awor caba CBN ta pidi pueblo en general pa tene e fecha 24 di Juni reserva den agenda. Ariba e dia aki CBN tin su siguiente actividad cultural relaciona cu dia di San Juan ‘Dera Gai’. Nos ta conta cu e mesun asistencia masal cu nos tabatin pa cu nos ‘Fiesta Arubiano’.