Diabierna tabata un anochi yena cu magia, ora cu Tanto Cuenta su elenco a presenta tres storia traduci den un forma particular y crioyo pa Desiree Correa. For di e prome cuenta di hada te cu e ultimo, e publico cu a presenta e cuentanan di hada, diabierna 2 di juni a gosa inmensamente. Den un sala completamente yen, por a skucha e muchanan ta reclama e bruha Bruha di e cosnan inhusto cu e tabata haci cu prinses Aurora. Nan tabata sorprendi pa e sunchi cu e prins a duna Shinishi Sushi, ora cu un bruha a maldicion’e y pon’e drumi. Bo por a skucha e asombro den nan stem, ora nan a mira e prins cu pa medio di magia a bira un pisca. Nan tabata grita Djindjita, e casa di e piscado, ora e tabata haci cos di egoista y mal hende cu su casa Pedrito. Por a tende nan hari di e comentarionan tribi di Chabelito, e maestro di ceremonia, Emeil Vijsma. Felis nan tabata ora e hada madrina di Shinishi Sushi a transforma e den un prinses. Riba cara di e muchanan por a mira expresionnan di momentonan inolvidabel di suspenso.
Berdaderamente un transformacion complete, tabata sosode ora segun cada escena e ‘background’ cambia di un salon den un kasteel pa un costa di lama cu barancanan grandi. Cada escena tabata yena cu momentonan, unda e publico por a biba situacionnan di bida real, treci dilanti door di personahenen desplegando rolnan gracioso, pero tambe rolnan di figuranan malbado. Cada artista a destaca den nan rol y esey tabata visibel pa e cantidad di aplauso cu nan a haya despues di cada actuacion.
Fundacion Bon Nochi Drumi Dushi kier probecha pa gradici Unoca, cu ta e cofinanciado di e proyecto. Un danki na e miembronan di elenco di Tanto Cuenta, Zahira Zaandam, stage coordinator, backstage crew, boluntarionan cu a yuda cu benta di buki, tas y t-shirt, e cantantenan invita Melody Franken, Rakesh y Ashram Persaud y Xenon Orfao, e medionan di comunicacion cu a promove e actividad aki, e sponsernan y tur hende cu den un forma of otro a contribui na exito di e proyecto.
Publico di Aruba cu no a logra haya mas carchi pa presencia e show, keda pendiente y sigui nos via nos pagina di Facebook pa Tanto Cuenta den bario.