Masnoticia a bishita Psicologo, Dimitri Halley, conoci pa su manera unico den tratamento di psicologia y spiritualidad aki na Aruba, pa combersa un rato riba e tema di salud mental, y con esaki a afecta nos comunidad e aña aki por medio di e pandemia. Manera conoci, e crisis aki a lanta diferente problema mundialmente y sigur den nos comunidad riba e parti social, mental y emocional.
E psicologo ta expresa cu den tur e cos aki, e parti di e impacto mental no a wordo bon tuma na cuenta. “Nos a wak e parti economico, etc, pero ningun momento ami personalmente no a sinti cu a tuma e parti mental seriamente na cuenta,” segun sr. Halley.
Mientras cu e impacto maximo di e pandemia aki ta un psicologico. Ora un hende cuminsa sinti cu e no ta bay por cumpli cu su obligacionnan, na unda su ingreso ta baha door di e pandemia, esey ta dal un hende psicologicamente hopi duro. Bo ta bay den un nivel di panico, cu ta basicamente stagna bo. E impacto den sociedad mentalmente riba e tereno di panico, y sigur varios otro problema cu ta Sali di esey ta hopi grave. “Hendenan cu ami ta hayando den mi practica, anto e Covid a bin a riba constant, ta cu el a dal fuertisimo y hinca hende den atakenan di panico, ansiedad, depresion, door di esey tambe relacionnan a wordo stroba.”
Solucion no ta droganan psikiatrico
E psicologo ta comparti cu e impacto di e pandemia aki ta hopi mas grandi di loke nos ta kere, den tur area. Pero saliendo for di e parti mental. “Mientras cu esey a wordo bisa, e solucion no ta pa bay verdoof e problema.” Segun sr. Halley. Ansiedad, depresion y diferente tipo di abuso a lanta cabes durante e crisis aki, pero e solucion no ta droga psikiatrico segun e psicologo ta expresa.
“Ora nos trece e puntonan aki, hopi biaha e partidonan enbes di tuma reflexion propio cu e sistema mes ta faya, nan ta haci damage control y no pa bay den profundidad.”
Sr. Halley ta subraya cu e berdad ta cu Covid19 a crea un impacto formal den mente di hende di pueblo, pero na mes momento mester bisa cu el a ‘trigger’ cosnan cu tabata t’ey caba. Nos ta papiando aki di un sociedad cu no a haya un cuido mental adecua, nunca. “Semper a wordo trata cu medicamento psikiatrico. Pero corda bon, un cantidad enorme di malesanan cronico tambe ta bin di problemanan psicologico, di abuso di pasado, dus nos tin un sociedad cu a tapa y sconde problemanan real, socio-emocional, por medio di verdoof e problema,” sr. Halley ta splica.
No mester laga e Covid bira un excusa pa e problemanan, y tambe pa medidanan, uzando e pandemia como un pretexto pa introduci medidanan cu kier a inicialmente haci caba. Den un siguiente publicacion nos lo cubri mas punto interesante den nos combersacion cu sr. Dimitri Halley.