Recientemente Traimerdia a celebra nan 20 aña di existencia y ta algo di aplaudi. E dedicacion di esunnan cu ta traha cu mucha ta un trabou noble y merese tur elogio y apoyo, segun Parlamentario Jennifer Arends- Reyes. E demanda pa opvang na Aruba algo cu semper tawata existi pero den e mundo di awendia mayornan tanto mama y tata ta traha te mas atardi y no ta tur mayor tin lugar pa laga nan yiu. E idea pa continua cu e proyecto y amplia e cantidad di scolnan cu ta keda habri pa ofrece e servicio aki mester bira hopi mas. Na e momentonan aki 1000 mucha ta hasi uzo di Traimerdia pero e demanda tey pa motibo cu semper e wachtlijsten ta yen. Tambe tin un demanda pa hobenan di scolnan secundario tin opvang na nan scolnan mes caminda ta ofrece actividadnan extra curicular. Na Merca por ehempel tin varios proyecto cu ta enfoca pa hasi uzo di e edificionan di skol despues di merdia cu tambe ta sumamente exitoso. Na Aruba tambe durante gabinete Mike Eman II a cuminsa diferente proyecto piloto pa e opvang despues di scol y sigur ta proyectonan cu merecese continuidad. Ta importante pa cada mucha y hoben cu ta wordo exponi na deporte, arte, baile y musica y haci e drempel mas abou posibel mañan lo por ta un persona cu lo goza di diferente beneficio como persona y lo por ta un persona mas envolvi den cosnan positivo pa su mes, famia y comunidad. Mester percura pa mucha chikito, muchanan di edad di skol y hobennan tin bon opvang, tin un lugar cu tin seguridad y ta cumpli cu reglanan basico pa por traha cu nos muchanan y hobennan. E siman cu ta bin Aruba lo conose un ley pa regula y stipula rekisitonan basico pa cu centro di cuido di mucha, sigur lo ta un paso grandi y positivo pa Aruba sra Arends-Reyes ta termina bisando.