Dia 20 di December ta mira bek con pa prome biaha Museo Arqueologico Aruba a habri na 1981 na Zoutmanstraat 1, un vision cu a bira realidad. Esaki tabata algo grandi pa Aruba como tambe pa e region di Caribe, pasobra Museo Arqueologico Aruba tabata un di e prome museonan arkeologico den Caribe. Tanto publico local como e bisitante internacional por a disfruta di e coleccion y informacion di nos herencia cultural arkeologico, y cu hopi animo y pa hopi aña, Museo a ofrece actividadnan educativo y recreacional pa bishitantenan di tur edad. Pa algun tempo awor, Museo Arqueologico a haya su mes obliga pa cera e salanan di exposicion pa motibo di trabounan di mantencion atrasa y lo habri bek den anja venidero.
Exposicion “Caribbean Ties”
Mientrastanto ta trahando duro pa finalisa proyecto nobo pa comunidad di Aruba den e aña nobo. Museo Arqueologico Aruba tin un historia largo di colaboracion estrecho cu Universidad di Leiden, cual a conduci na investigacionnan hopi importante cu resultadonan impresionante di cual sigur por corda e anochi exitoso na unda a presenta e resultadonan di St. Cruz 35. E proyecto di NEXUS 1492, lidera pa profesor dr. Corinne Hofman, a provee e oportunidad unico pa trece, den colaboracion cu Fundacion 1403, e exposicion internacional ‘Caribbean Ties’ na Aruba. E exposicion aki lo habri simultaneamente na diferente lugar den region di Caribe, como tambe na Hulanda, na Mei 2019. Banda di esaki Museo a cera un laso di coperaciona cu “MUSEON” na Hulanda, pa un programa publico conhunto di Caribbean Ties.
Publicacion cientifico Dibuho riba Baranca
Dr. Aad Versteeg, arkeologo consehero di Museo Arqueologico, hunto cu drs. Harold Kelly, arkeologo di Museo Arqueologico, a colabora algun tempo pasa pa un investigacion y documentacion di tur dibuho riba baranca di Aruba, cual a resulta den un publicacion , cu lo conta cu mas di 400 pagina y 1000 potret. E publicacion lo tin como meta primordial pa catalogisa tur e dibuhonan visible cu ta full rond riba Aruba. Banda di esaki lo tin informacion aditional di e dibuhonan y datacionan cu a ser hasi riba cierto pintura y nan estado. Fuera di esey e ta e prome documentacion cu ta catalogisa e dibuhonan riba baranca sistematicamente. E publicacion aki lo forma un parti esencial den e proceso di nominashon di pinturanan riba baranca di Aruba riba e lista di patrimonio mundial di UNESCO.
Keda pendiente pa mas informacion riba esaki y otro actividadnan di Museo Arqueologico Aruba via facebook Archeo Aruba y National Archaeological Museum Aruba. Pa e dianan di fiesta oficina di Museo Arqueologico ta cera pa publico di dia 24 di December 2018 te cu dia 3 di Januari 2019. Museo Arqueologico Aruba ta desea henter comunidad di Auba un Bon Pasco y Feliz 2019.