E proyecto di alga, cu banda di e refineria, ta bay ehecuta; ta unico na mundo. E tecnologia pa cultiva alga no ta algo nobo, pero e cantidad den cual kier bay haci esey na Aruba, lo ta mas grandi cu na cualkier otro luga na mundo.
Matanan en general tin mester di CO2 pa crece. CO2 ta, hopi biaha, e producto cu ta keda atras di un proceso di combustion, manera den e motor di un auto of den un boiler di refineria.
Demasiado CO2 no ta bon pa medio ambiente, ta afecta e capa di ozono y ta contribui na cayentamento di mundo. E idea pa captura e emision di CO2 y despues suministra esaki na e alganan, tampoco ta nobo. Fuera di esey, e alganan por wordo uza despues den procesamento di productonan manera remedi, cosmetica y combustibel.
Alganan no ta solamente e matanan cu ta crece mas lihe na mundo, pero ta contene tambe e ‘concentracion di azeta’ mas halto conoci. E ‘azeta’ cu por saca for di alganan ta, por ehempel, hopi biaha mas cu esun di bonchi di soya of palma. Nan por crece den practicamente cualkier clima, tanto den awa dushi como den awa salo y na casi cualkier suela; tambe den regionnan cu, en realidad, no ta apropia pa agricultura, manera un desierto of suela contamina. Nan no ta tuma e espacio di un suela caminda por produci otro cultivonan util.
Alganan por wordo cultiva tambe na terenonan contamina manera esun di e refineria. Loke ta interesante di esaki ta cu e cultivo di alga, en principio, por continua normalmente mientras cu e suela contamina ta wordo purifica di un manera organico.
Na e momentonan aki ya caba un cantidad grandi di cultivonan di alga na un nivel chikito. Nan ta produci mas tanto pa suministra material pa remedinan.
Loke ta haci e proyecto di Aruba unico ta cu ta tuma e paso pa hiba e produccion na un nivel industrial, suficiente grandi pa genera ganashi den produccion di material cu ta wordo uza pa traha Omega 3 y Astaxanthin, y tambe como un anti-oxidante den cuminda y industria di cuido di cuero. E produccion lo mester ocupa algun kilometer cuadra, pega directamente na e refineria.
E intencion aki ta unico na mundo y lo reenforsa e posicionamento di Aruba como un showcase pa tecnologia sostenibel. Mundo henter lo bin Aruba pa mira esaki. Ora cu e proyecto aki logra, lo tin un potencial enorme pasobra e lo ta, en realidad, un solucion pa problemanan grandi di medio ambiente; no solamente pa tur refineria na mundo, pero tambe cada fabrica productor di CO2, cu en realidad no ta costa nada.