Biblioteca Nacional Aruba (BNA) ta tumando pasonan actualmente pa reduci su consumo di coriente, cu sosten di TNO Caribbean. E instituto estableci na Aruba ta dirigiendo un proyecto piloto na BNA, unda ta enfoca riba factornan relativamente simpel pa ehecuta. Por ehempel, optimalisa e maneho di clima pa medio di miho mantencion, hisa temperatura cu algun grado y instalacion di timer pa asina percura cu e airconditioning ta paga den oranan di anochi, ora cu no ta uza e espaico di BNA. Ademas, hunto cu e pasonan aki, den e ultimo lunanan a cambia tur e iluminacion, tanto paden como pago pa lampinan LED, den cuadro di e proyecto Philips. E trayecto completo ta monitorea pa aparatonan special di TNO Caribbean, di forma cu por midi e reduccion di consumo detayadamente.
E proyecto piloto di BNA ta sigui despues di un analisis haci pa TNO na 2015 riba e potencial di spaarmento di energia den edificionan publico. A trata e rapport riba peticion di Pais Aruba y a selecta 25 di e edificionan publico, di 155 en total, cu tabata gasta mas coriente. Despues a ehecuta un audicion energetico riba e 25 edificionan aki: BNA tabata un di nan. Den e rapport a conclui, cu si haci un inversion di un solo biaha di mas of menos 550 mil florin na tur e edificionan aki, combina lo produci un reduccion substancial di gasto di coriente. Ta calcula cu por spaar caha publico no menos cu 1.4 miyon pa aña na consumo di coriente. Lo por logra esaki door di ehecuta algun medida relativamente simpel, manera regula luz, percura pa mantencion apropia di e sistemanan di airconditioning, regula temperatura y instalacion di timers.
Experto di ambiente urbano di TNO Caribbean, Jennifer Boekhoudt a bisa cu “eficiencia energetico ta hunta un papel importante den cualkier acercamento di energia duradero. E coriente mas barata, ta e coriente cu no ta wordo consumi. E prome paso ta y mester ta semper pa mira con por gasta menos coriente. Y den un ambiente di construccion, esaki no ta diferente. Ainda na 2016 ta pone mucho poco atencion na eficiencia di energia di eficicionan na Aruba. Esaki ta un oportunidad perdi cu meste cambia. Inversion den procesonan dirigi na spaar coriente ta mucho mas efectivo pa costo, compara cu inversion di generacion di energia duradero pa medio di fuentenan alternativo. Y e ambiente di areanan construi ta duna nos un oportunidad unico pa saca hopi probecho a cambio di gastonan relativamente mas abao.”
Segun TNO Caribbean, pais Aruba, cu BNO como proyecto piloto ta un bon caminda pa tuma e prome paso na un portofolio di edificionan cu ta energeticamente eficiente. BNO riba su mes ta bira un ehempel pa otro edificionan publico. No solamente sector publico por probecha di e pasonan aki. Sector priva tambe por siña hopi di e proyecto aki y haya estimulo pa tuma accion comparabel pa asina por baha e gasto di consumo di coriente.