Serlimar Sui Generis a inicia su proyecto nobo “Serlimar Adopts a School” caminda a adopta Scol Caiquetio pa e aña escolar aki di 2018/2019. E proyecto Serlimar Adopts a School tin como meta pa adopta un scol pa guia y sostene e scol aki durante un aña escolar en conexion cu conscientisacion di maneho di desperdicio y tambe limpieza di nan scol. E mission di e Proyecto aki ta pa asisti Scol Caiquetio 100% en conexion cu maneho di desperdicio na e scol mes pa crea y conscientisa e muchanan y docentenan pa yega na un miho maneho di desperdicio pa asina reduci e candidad di sushi cu ta wordo produci y benta afo. Como parti di e proyecto aki Serlimar lo traha hunto cu e scol pa duna charla informativo encuanto con pa reduci, re-uza y recicla desperdicio y alabes pa practica esaki cu proyectonan cu e studiantenan mes por ehecuta.
Serlimar Sui Generis a scoge Scol Caquetio como e prome scol cu ta wordo adopta, como cu nan tin maneho di desperdicio y conscientisacion di maneho di desperdicio y limpieza den nan plan di aña escolar, caminda ta educa e muchanan con pa anda cu nan desperdicio y tambe siña nan con pa mantene no solamente nan scol pero tambe den e bario di e scol limpi. Serlimar tin e pensamento cu Scol Caquetio ta un bon ehempel pa e comunidad di Aruba y pa es motibo kier facilita y aporta na e scol su plan relaciona cu maneho di desperdicio y limpieza.
Recientemente Serlimar a presencia e apertura di e “Greenhouse, Nos Hofi” di Scol Caiquetio cu ta un tremendo Proyecto inovativo, cu ta un otro stap den e direccion corecto pa yega na un maneho di desperdicio na e scol den e forma responsabel. Cu e “Greenhouse” aki ta nifica cu Scol Caiquetio lo produci menos desperdicio di compras di berdura y tambe lo reduci e cantidad di desperdicio cu ta wordo benta afo. En conexion cu e proyecto aki Serlimar lo bai asisti Scol Caiquetio pa maneha nan desperdicio organico, pa asina nan por traha nan mesun gordura pa nan Hofi cu e proceso di “composting”.
E vision di e proyecto Serlimar Adopts a School ta, pa adopta un scol pa un aña escolar caminda lo guia, asisti y sostene cu e conscientisacion di maneho di desperdicio y limpieza. Alebes lo bai duna servicio completo pa cu e recogemento di desperdicio y tambe Serlimar lo asisiti den limpieza di scol y ora di evento. En conexion cu e proyecto aki, Serlimar pronto lo bai anuncia e campaña escolar grandi relaciona cu e conscienticacion di e problema di desperdicio na tur scol di Aruba y con por aporta na un miho maneho di desperdicio door di simplemente reduci, re-uza y recicla.
Serlimar Sui Generis ta gradici e cabesante sra. Carolina y cabesante suplente sra. di Scol Caiquetio pa e confiansa y e colaboracion pa cu e proyecto aki di Serlimar Adopts a School. Pa mas informacion of pregunta por tuma contacto cu departamento di mercadeo di Serlimar Sui Generis.