Kiwanis Club of Aruba ta continua cu e campaña DNT TEXT & DRIVE pa yuda stimula e siguridad den trafico. E campaña ta consisti di un poster cu lo wordo poni riba e rednan social, aviso den corant, sticker y tambe borchi na diferente lugar strategico na Aruba. Cu e campaña aki Kiwanis Club of Aruba ta contribui na un manera pro activo na e siguridad den trafico door di conscientisa e comunidad di Aruba pa no manda mensahe mientras ta stuur auto. E ta alarmante pa wak cuanto chauffeur ta hasi uzo di nan telefoon pa manda mensahe ora nan ta tras di stuur y no ta pone atencion pa loke cu ta pasa riba caminda. E accion irresponsabel aki ta aumenta e risico di ocasiona accidente cu consecuencia hasta mortal.
Kiwanis Club of Aruba ya pa mas di 30 aña tin su proyectonan pa stimula seguridad den trafico, entre cual por menciona e ‘Traffic Thermometers’ situa na diferente lugar stategico unda ta registra e cantidad di hende cu a fayece durante aña door di accidente di trafico na Aruba. Na aña 2013 a inicia cu e campaña di ‘Don’t Text and Drive’ cu un jingle cu por a ser scucha na varios emisora di radio y despues a continua cu un video di DNT TXT & DRIVE cu a bay viral rond di mundo surpasando 196 miyon views.
Kiwanis Club of Aruba ta invita e comunidad pa bin busca nan sticker diabierna 14 di Juli na CITGO Wayaca Service Station entre 5 ‘or di atardi y 7’or di anochi y asina uni na e campaña cu tin como obhetivo pa conscientisa e automobilistanan cu trafico tin su risico mortal cu ne pues percura pa bo core auto responsabel.
Kiwanis ta un organisacion global di boluntario dedica na mehora mundo via un mucha y via di un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1965. Pa mas informacion di Kiwanis Club of Aruba y of su actividadnan por acudi na www.kiwansaruba.org of Facebook page Kiwanis Club of Aruba. Tambe por bishita e website di Kiwanis Internacional na www.kiwanis.org