Kiwanis Club of Aruba, Watty Vos Boulevard, DOW y Polis di Trafico a uni forsa den un proyecto na beneficio di siguridad den trafico na varios scol basico y preparatorio na Aruba.
Contenido di e proyecto
E proyecto yama ‘Paga Tino!’ ta encera e diseño y sigui pa produccion di un borchi di trafico cu riba dje e velocidad maximo di 20 KM/ora. Inicialmente un total di 24 borchi lo wordo instala den cercania di 24 scol basico y preparatorio selecta a base di e situacion di trafico na e scolnan aki. Den un siguiente fase den futuro e proyecto aki lo por wordo amplia pa mas scol.
Motibonan pa bin cu e proyecto
Actualmente fuera di un ‘sleeping police’ den cierto casonan – no tin borchi di trafico instala pa stimula automobilista baha nan velocidad ora di acerca e scolnan. Velocidad halto di automobilistanan den vecindario di scolnan ta wordo considera pa Polis di Trafico un factor di riesgo pa e siguridad den trafico pa e muchanan. Instalacion di e borchinan di trafico na e scolnan di e proyecto ‘Paga Tino!’ ta pas den e maneho di trafico di DOW yama Engineering, Education y Enforcement (3E) y ta wordo spera di lo yuda aumenta siguridad di trafico na e scolnan concerni.
Duna bek na comunidad
WVB Project Company VBA – cu ta responsabel pa e proyecto di Watty Vos Boulevard – den su deseo di duna bek na e comunidad di Aruba riba e tereno di un trafico sigur, a dicidi di pone disponibel e suma financiero necesario pa realisa e proyecto aki y subsecuentemente a uni forsa cu Kiwanis Club of Aruba, DOW y Polis di Trafico pa asina alinea e ideanan y concretisa e proyecto te na instalacion final di e borchinan aki.
Desvelo ceremonial
Dialuna 15 october 2018 e desvelo ceremonial di e prome borchi di trafico den cuadro di e proyecto ‘Paga Tino!’ a tuma lugar na entrada di Misa Santa Anna, cu den su cura ta acomoda 3 scol basico y preparatorio. E embeyecemento di e aceranan dilanti di e entrada di e misa aki tambe ta parti di e proyecto di Watty Vos Boulevard, cu awor ta haya adicionalmente su borchi di trafico pa yuda siguridad di trafico pa nos muchanan cu ta frecuenta e area di trafico pisa aki. Kiwanis Club of Aruba kier gradici WVB Project Company VBA, DOW y Polis di Trafico pa nan contribucion pa haci e bunita proyecto aki posibel.
Kiwanis ta un organisashon global di voluntarionan dedica na cambia e mundo pa via di un mucha y un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1965. Pa mas informashon di Kiwanis Club of Aruba y of su actividadnan por acudi na nos Facebook page of nos website www.kiwanisclubofaruba.org.