E proyecto di expansion y renobacion di Imsan ta bayendo masha bon mes, segun director di e instituto medico, dr. Joel Rajnherc. El a splica cu pafo ta mira e construccion ta tumando luga. Nan a caba di basha e fundeshi di e bunker, esta e cas unda cu e mashin pa bestraling ta bay bin den dje.
Awo e ta bay dura un tempo prome cu e bira mas duro, prome cu pone e blokinan grandi di e murayanan di pafo riba dje, cu ta bin specialmente for di Merca, traha eynan.
No ta wordo basha na Aruba, pero ta blokinan special cu ta pas den otro, manera un caha di leho.
Imsan ta hopi entusiasta cu esaki a tuma luga y cu ta asina leu. Paden tambe hopi di e departamentonan ta cuminsa keha, pasobra e proyecto ta andando basta lihe.
Ta bezig cu departamento di wowo. Nan a wordo poni den un parti di e edificio temporalmente pa por sigui atende cu e pashentnan.
Sinembargo nan departmento nobo ya ta tumando su forma nobo caba. Tin tres dokter specialista di wowo den servicio di ImSan y ta mirando futuro masha briyante pa nan tambe.
E departamento di sterilisacion, unda tin cu haci e instrumentonan steril, tambe ta bao di construccion y ta tumando su forma. E ta bayendo hopi bon. Ta spera cu esey lo bay ta cla medio di Februari. Ta trahando riba e departamento di pre-operativo y post-operativo di e salanan di cirugia.
Ta bezig cu tur tres sala di operacion. Dialuna ta yega e partnernan di Hulanda, cu ta bin pa wak con mester pone tur e booms, tur e brasanan cu ta sali for di e plafond, unda cu ta colga tur e aparatonan, e luznan, e monitornan riba dje. Nan ta bin pa haci un inspeccion final, pa nan tin e programa cla pa sa unda tin cu pone e refuersonan den plafond.
ImSan ta hopi entusiasta. Eigenlijk hasta e contratista mayor a bisa cu nan ta bay sigui traha un siman mas largo cu normal.
Normal nan ta stop dia 15 di December. E aña aki nan ta bay sigui un siman mas largo pa yega un tiki mas leu. Nan ta hopi contento y hopi entusiasma.
Segun dr. Rajnherc, mester corda cu tur cos tambe ta depende e planta central nobo di energia. Ta pone chillernan completamente nobo, generatornan nobo ta bin. Tur esey tin cu wordo ahusta na e mashinnan nobo.
Algun departamento ta bay ta cla, pero ta bay ta wardando ainda riba e planta nobo central di energia. Ta spera cu e departamento nobo di wowo si ta bay ta operacional entrante medio Februari caba.
E otro departamentonan grandi ta bay ta bao di construccion. Ta spera cu e salanan di operacion lo bay ta cla y kisas operacional caba pa fin di aña.
Den otro palabra nan ta na ora, bayendo den hopi bon direccion.
Dr. Rajnherc a splica cu semper a boga cu nan ta bay hisa e calidad di servicio cu ta wordo brinda. Ta spera cu na fin di 2019, pa comienso di 2020, por mustra cu ta cumpli tambe y no ta solamente palabra.
Hopi ta depende di con e situacion ta bay ta den e otro hospital tambe. Pasobra pa baha e lista di espera bo mester ta haciendo mas operacion cu ta haciendo awo. Si tur cos bay bon y bay manera spera, ta trahando hunto pa yega cu por baha e tempo di espera. Pero esey ta algo cu por duna un contesta despues. Mester ta cauteloso pa no hisa tur speransa mucho lihe.
Segun dr. Rajnherc, ora cu cuminsa, no ta bay ta cuminsa 100% riba top cantidad cu por haci. Bo tin cu crece den bo custumber. Ta cumpra e jasje un tiki grandi pa por crece den dje, pa por yega na e volumen completo cu por atende cun’e. E espera ta hopi bon. Ta trahando hopi duro hunto cu Baptis Health di South Florida, pa yega na e capacidad cu kier yega. Ta kere cu por hisa e eficiencia di tratamento, e eficiencia di e flow di pashentnan y cu esey lo bay haci cu ta bay reduci e tempo di espera.
Vooral den departamento di wowo, dr. Ranjherc ta kere cu lo bay ta hopi avansa y hopi lihe. Pasobra esey lo ta un di e departamentonan cu ta cla pa haci operacion.
Radioterapia predominantemente lo bay cuminsa bende pa afo. Pero por bisa di antemano caba cu tin un capacidad basta grandi cu e mashin nobo cu ta bay haya y cu e personal. Cu esey si ta algo cu ta bay tin un exceso di posibilidad riba dje, prome cu tur e otronan.
Riba e otro departamentonan sigur kier reluci, baha e tempo di espera, prome cu cuminsa propaga pa bay afo. Esey semper ta algo cu na prome luga tin cu brinda servicio na nos poblacion di Aruba, na e aseguradonan di AZV. Esey ta e prome deber, segun dr. Rajnherc.