Segun hefe di Censo, Sharin Luydens, ta bon pa comunidad di Aruba sa cu maneho di emision (uitgifte) di rijbewijs y responsabilidad pa tin provision di carchi pa otorga rijbewijs te ainda ta den man di KPA y no ta responsabilidad di Censo, cu esaki a caba tur e tempo ta wardando e proyecto. Pues no tin motibo den e caso aki di ta referi na Censo.
“Nos ta, y a duna conseho den henter e trayecto aki, pero no ta den nos man ni nos responsabilidad si provision di caarchi ta caba y/of no a wordo pidi na tempo”, según sra. Luydens.
Loke ta e proyecto mes, pues di tuma over e responsabilidad pa e parti di emision di rijbewijs for di KPA, a conoce en berdad su retraso. Sra. Luydens ta informa MasNoticia cu e plan tabata pa a bay live y tuma e emision di rijbewijs na Censo na luna di juli-augustus 2020. Pero pa motibo di e pandemia di Covid-19 y tur su consecuencianan y tur su restriccionnan cu esaki a bin cune, e proyecto a conoce un retraso.
Luydens: “Nos ta spera, si tur cos bay bon, cu pa final di november pa december 2020 nos tuma esaki over si en berdad tur stakeholder, pues partidonan den e proyecto aki, cumpli di nan banda cu loke a wordo palabra.”
Un proyecto di emision di un documento di identificacion, den e caso aki e rijbewijs, ta implica hopi mas cu solamente pone un machine di print. E ta ensera hopi mas cu esey, por ehempel un aplicación (software) cu su diseño unico (logisch ontwerp), cu ta proteha e integridad di e proceso (digitale functiescheidingen) y tambe e integridad di e caarchi mes cu ta tuma hopi trabou tempo y dedicacion. Pues ta hopi trabou Censo a dedica na e proyecto aki, pero ta sigur cu toch despues di warda un tempo Pais Aruba y e clientenan lo saca probecho di esaki.