Ariba e fecha di 23 di april 1922, 96 aña pasa, Segundo Jorge Adelberto Ecury (mihor conoci como “Boy”) a nace na Aruba. Recordando su fecha natal, Amigonan di Archivo (ADA) kier tuma e momento aki pa pone pueblo na altura tocante un proyecto archivistico andando over di Boy su bida y e documentacion di esaki. Pa hopi aña caba Archivo Nacional Aruba (ANA) tawata ricibi documento di famianan di Boy Ecury, incluso di su mayornan, kendenan a warda entre otro varios carta- y potretnan di tempo di Boy su infancia na Aruba y su bida durante e añanan di guera na Hulanda.
Como cu 2018 a wordo nombra “Jaar van Verzet” (“Aña di Resistencia”) den contexto di recorda e historia di SegundaGuera Mundial na Hulanda, ADA a pidi y a ricibi fondo di e fundacion “vFonds” (Het Nationaal Fonds voor Vrede, Vrijheid en Veteranenzorg) cu ta percura pa fondo pa proyectonan relata na paz, resistencia y veteranonan na nivel di reino. Esaki a culmina den e proyecto “Registracion di material di Boy Ecury y su uzo pa publico en general”, den cuadro di cual durante di e aña aki lo percura pa haci e coleccion na ANA accesibel pa publico. Cu e fondo adkiri e coleccion por wordo inventarisa, restaura y digitalisa. Tambe ta compila un inventario di tur sorto di documentacion, artefacto y monumento cu tin di haber cu Boy Ecury den forma directo of indirecto. E resultado di e investigacion aki lo wordo publica den un guia di investigacion. E guia aki lo ta accesibel pa publico en general, pero tambe specialmente pa scol y demas instancianan relaciona cu enseñansa. ADA lo sigui duna mas informacion durante desaroyo di e proyecto. Por sigui ADA riba nan pagina di Facebook pa keda na haltura di e.o e proyecto aki.
Ademas ta en busca di tur sorto di documentacion, artefacto y monumento cu tin di haber cu Boy Ecury. Si bo persona tin algo cu bo ta pensa lo ta interesante y/of relevante, tuma contacto libremente cu nos. E proyecto ta wordo coordina pa Daniella Britt bou di guia di ANA. Pa cualkier pregunta y informacion por tuma contacto cu Sra. Britt na 5628884 of [email protected] of [email protected].