Federacion di Ahedres conhuntamente cu Traimerdia ta cla pa start cu e proyecto ‘Ahedres ta bay den Bario’ dia 1 di october venidero. Cu e proyecto aki e federacion ta spera di por brinda tur mucha di Aruba entre 6 y 12 aña e posibilidad pa sigui les gratis di ahedres. Ta conoci cu e deporte di ahedres por stimula e abilidad cognitivo di e mucha y por lo tanto por yud’e e.o. den su prestacion na scol.
Lesnan lo wordo duna na e diferente localidad di Traimerdia, pero tambe den diferente Centro di Barionan. E lesnan ta completamentamente gratis.
Pa e training lo bin un maestro internacional di ahedres di Cuba, den persona di Lázaro Bueno Pérez. E lesnan ta programa pa draai den ciclo di 3 luna.
Lo cuminsa cu e lesnan na Traimerdia den e diferente districtonan, pero tambe den Centro di Bario Lago Heights y esun di Playa Pabao. Na e dos centro di barionan aki tur mucha ta bonbini pa tuma les (gratis). Lesnan lo wordu duna entre 2’or – 3’or y lo cuminsa na San Nicolas dia 1 di october (tur dialuna) y na Playa Pabao 2 di october (tur diamars). Mayornan cu kier keda durante e les, por haci esaki libremente.
Por inscribi e mucha den e siguiente forma:
- Telefoon: 594-5590/594-1351
- Email: [email protected]
- Site: www.arubachess.com
- Clubhuis: diahuebs anochi of diasabra entre 12:30 pm – 4:30 pm
Mas informacion over di e proyecto por wordo haya riba e website di e federacion (www.arubachess.com), pero tambe por haci uso di cualkier otro medio di comunicacion cu ta menciona aki riba pa bin den contacto cu e federacion. Por like nos tambe riba nos Facebook page (arubachessfederation) pa asina por haya informacion relata cu e proyecto aki.
Nos ta spera cu nos por yama bonbini na hopi mucha di Aruba na e lesnan aki. Tambe kier a yama un danki un biaha mas na tur nos sponsornan cu ta e.o. Lotto Aruba, WEB Aruba, Aruba Bank, Arubus y Setar.
Aruba henter, ban bisa: ‘Yes to Chess’ y participa den e proyecto ‘Ahedres ta bay den Bario’ cu ta na bienestar di nos hubentud y comunidad.